TURA: A’chik Youth Movement for Betterment of Society (AYMBS), ACHIK aro gipin NGO-rangni Tura-ko Winter Capital songna dabianiko chakpaataha.
“Tura-na Winter Capital-ko on·telna nanga, ian chingni man·a nanggnigipa bil ong·a, jekon bilsi 1972 Meghalaya a·dokko man·ani somoio Garo Hills-na Winter Capital-ko on·na ku·chakaha. Iana agreba Khasi-Jaintia jong/ada aro no/abirangoniko mamingkon bi·dapa dongja, indiba jekon skango Garo Hills-na on·na ku·chakahachim, uko on·chinasa sorkariko gisik ra·atenga,” ine organisation-ni president Peterjob A Sangma aganaha.
Indake ong·engon NPP-ni dilgipa ba koborna ku·wattimgipa Ampareen Lyngdoh-ni agangipa kattana suk ong·gijaniko parakate, ‘Ampareen-ni agangipa kattarangara, party-onima sorkarioni ong·a, ba Chief Minister Conrad Sangma-ni ge·etanio iandakgipa kattarangko aganama? ine sing·ate, iako talate on·china organisation, dabiaha.
