TURA: Kajia-golmal ong·enggipa Manipur-o Meitei jatoni namgijako dakgipa jinmarang Kuki me·chik sakgniko til·ekgrime nagande re·ramate kal·ake roani giprorogipa video-ko nike mijalo ACHIK raken jegalataha.
”Ua a·sel Manipur-ni songadamo ong·aha aro ua a·selna bichalko on·china agan-jikjakanirang gapaha. Koborrango aganani gita ua Kuki me·chik sakgniko namgijako dakgipa dolsa uamangni nokrangoniko saldrakaha aro songsul jatoni ine matnange ka·saninggija tik·ekgrime rona skang song gita nagande re·ramate roaha.’’
ACHIK, kobor ra·timgiparangna aganao ua a·selni bidingo namen suk ong·gijaniko janapaha, ‘‘Dosi grigipa Kuki me·chikrangni kosako namgija dakaniko nike chinga aiao inmanpilaha. Indakgipa namen namgija dakani ia skia-pora man·ani chasong songsalo ong·na nangani dongjachim aro chu·gimik niamko ja·rikna nangchongmotachim. ACHIK, kal·ake roako man·giparang aro uamangni nokdangrang baksa ku·cholsan chadengpaenga aro bichalko on·china chinga mol·molenga.”
“Ua a·selni bidingo aro bil-rengsirangko aro pilak manderangni mikkim rasongko mande ra·ani mongsonggipa ong·ani bidingo aro uamangni jatko ba janggi tangani obostako gamchate ra·gijani bidingo ta·raken mikrak-u·iataniko dakna aro skie on·a chanchiani ong·enga. Mikkangchi indakgipa a·selrang ong·taijana gita indakgipa namgija dakanirangko champengna chol-ramarangko dakchina aro ua jatrangko chel·chakna kam ka·enganirangko bilakbatatchina ACHIK sorkariko mol·molaha.
Ia namgija dakanichi mandeni bil-rengsirangni kosako bil man·enga aro bichalko aro pilaknan apsan bil-rengsiko on·china ACHIK janaptaiaha. Indakgipa namgija dakani kosako ku·cholsan chakatchina dol songpanggiparangko mol·molaha aro namgijako dakgiparangko bichalona ra·bachina aganaha.
