SHILLONG: Re·baenggipa 2028 bilsio Meghalaya-ni economy-ko $10 billion-ona sokatna krengenga ine parakatani ru·utgijan, Indiao kangal-cha·asibatgipa a·dokrangoni Megahalaya, Biharni ja·man gnigipa ong·enga ine parakatskaon, mikkang bilsi bongani somoion namen tang·doani donggen ine Chief Minister Conrad Sangma aganaha.
Indiao gnigipa kangalbatsranggipa a·dok ine parakatgipana maikoba agangenma ine sing·on, batanggimin bilsi bongani gisepo Sorkari bang·en neng·nikanirangchi ra·bianirangko chagrongna nangaha, uko ma·sina nanggen, Sangma aganaha.
“Ian altua ong·ja. Batanggimin bilsi 45-o chinga namen ja·manchakaha, re·anggipa bilsi bonga chinga dingtanganiko ra·bana namen krengaha, uagitan adita dingtanganirangko nikaha, jenan India Sorkariba namnikaniko parakata,” CM aganaha.
“ Ja·manchakaniko ra·chakosa an·ching re·mikkangna man·gen aro dingtangatna gita re·mikkange kamrangko ka·na man·gen,” ua aganaha.
Niti Aayog-ni gita jedakgipa report-rangkon on·ahachim, sorkari uarangko sulsul niroke kamrangko ka·anggen ineba CM aganaha.
“ A·dokko tang·doatna kam ka·anio ta·rakaigenma inon, somoi nanggen, man·ade man·aigen, anga ka·donga mikkang bilsi bongaon baditaba gadangko batsekangaigen, chief minister aganaha.
Mija mangmang, Niti Aayog-ni report-ko parakatanio, Bihar a·dokni ja·mande India a·song gimiko Meghalaya gnigipa kangalbatsranggipa ong·engachim.
Bihar a·doko kangal-cha·asigiparang da·omiting 37.21% ong·engon, Meghalayao 31.3% kangal-cha·sigipa manderang donga. Ia a·dok damgni ja·mano, Uttar Pradesh (30.03%), Jharkhand (29.75%) aro Arunachal Pradesh (22.21%) ong·enga ine National Family Health Survey-5 (NFHS-5)-o pangchake NITI Ayog parakataha.
