Jowai: Chief Minister Conrad Sangma-ni agangipa kattaoni, winter capital-na ACHIK-ni dabianganio Mini Secretariat-ko Tura-o dona ja·ku ga·angnaba donga ingipa katta baksa Jaintia National Council (JNC) aganangaha.
Tura-o dal·begipa adminsitrative-ko a·bachengatan baksanaba dal·begipa tangka botagipa donggnok ineba CM aganaha. “Mini secretariat-ko donangan baksa, an·chingni scheme-rangna on·anganio gimikni gita namdapataniko uamang nianggen aro re·baenggipa salo aro re·baenggipa bilsio bilakbatgipa bewalrango administration-ko mesokgen.”
Tura-o Governor-ni nokko rika matchotangenga ine ua agandapangaha.
Batanggimin 2022 bilsini December jao Jowai-o Mini Secretariat-na pangchakani ro·ongko songaha jean da·alonaba maming ja·kolan dongkujaenga, ine JNC uko gisik ra·atina nangnikaha. Ian lekka puonanina mangmangsan ong·aima? ine JNC sing·ataha.
Jaintia, a·doko bang·bate revenue-ko tarigipa ong·enga indiba dukni katta, ian namen mancha nirokgija galchipbatgipa ge·sa ong·enga jeon a·dok sorkari da·alonaba ra·nasan man·aia, on·pilnade ong·ja ine JNC agandapangaha.
Iawmusiang building complex-na jeon 2006 bilsioni ruut somoina donchipgipani bidingo sorkari maiko dakaha iako Council gisik ra·atinaba nangnike janapataha. Tangka paisa chamanirang bilsiantion sokbarikrikenga indiba kamrangde da·onaba donchipkuenga. Jaintia-ara namroroaniko man·angna maming bil dongjama ine Council sing·aniko donangna nangnikaha.
Ku·rachakgipa mingantiko da·o chu·sokate on·a nanga ine indakgipa somoio council bilake dabiangaha.
Manderangko chonikaniko da·on ta·rake sontongbo. Tura aro Jowai-ona Mini Secretariat-ko apsan plan-o rikna a·bachengatna nanga, ine JNC Public Cell Mebanteilang Sukhlain aganangaha.
