SHILLONG: India a·songara dingtang dingtang jat aro toromrangni meli-nangrime songdong a·chaenggipa a·songsa ong·ani gimin Uniform Civil Code-ko nangja ine Meghalaya a·dokni Leader of Opposition (LO) ba Opposition dolko dilgipa Ronnie V Lyngdoh parakataha.
Lyngdoh-ni parakatani gitade, India a·songo songdongenggipa dingtang dingtang jat aro toromni manderang batanggimin bilsi 75-na meli-nangrime songdong a·chabana man·ahani gimin India a·songna ua apsan niam ra·gataniko nangnikja.
Bilsi 75 batpile a·songni manderang, jatsa jatgipin aro toromsa toromgipinni manderang baksa tom·tomao songdong a·chabana man·aha ine janapatengon, a·songo songdongenggipa dingtang dingtang jat aro toromni manderangna ma·mong sorkarini apsan niamko ra·gatna miksonganiara cholina man·jawa ine Lyngdoh parakataha.
Songsalni badiaba badiaba dolrangkode ia Uniform Civil Code-oniko watna mitam manderang agantokengaha ine janapatskaengon, songsalni mitam dolrangkode ia niamoniko watgenchim ong·ode maikai a·song gimikna apsan niamko ja·rikani dongkugen ine Opposition dolni dilgipa sing·doataha.
“Iako name taridapna nangenga. An·ching politics aro election-ni man·gnirangnasa maikoba dakenga ong·ode an·ching namdapataniko ra·baenga ong·ja indiba namjabatanikosa ra·baenga,” ine Lyngdoh aganaha.
Indian Parliament-ni Monsoon Session a·bachengahani gimin pilak manderangan da·o ma·mong sorkarini ra·gatna miksongenggipa Uniform Civil Code-nasa kenchakani gnang nisotokengaha ine nikna man·a.