NEW DELHI: Meghalaya a·doko aro mongsongbate East Jaintia Hills a·jao niam gri chalaienggipa coke karkana ba koela so·ani karkanarangko pe·gale galchina gita East Jaintia Hills a·jani Deputy Commissioner ge·etaniko on·angani ja·man ia ge·etaniko India a·songni Supreme Court dontongatchengaha.
Druk Fuels Limited aro Meghalaya a·dokni gisepo Writ Petition ka·aniko Sukrobar salo Supreme Court, hearing dakangani ja·man, East Jaintia Hills a·jao niam gri chalaienggipa karkanarangko pe·gale galchina ge·etaniko Supreme Court dontongataha.
Niam gri chalaienggipa karkanarangko pe·gale galna ge·etaniko dontongchina ge·etaniko on·angengon, ia karkanarangko chalaina man·jana gita chipe donna Deputy Commissioner bilko man·skagen ine Supreme Court parakataha.
East Jaintia Hills a·jao niam gri chalaienggipa coke karkanarangko pe·galna gita Deputy Commissioner-ni ge·etaniko on·angani ja·man, iani bidingo Druk Fuels Limited, Supreme Court-o ijahar ka·doangskaahachim ine nikna man·a.
Indake ong·engon, da·o Supreme Court-ni gita iani bidingo changgipin hearing-ko daktaikujaskal karkanarangko pe·galna gita ge·etaniko SC dontongatchengaha indiba ia karkanarangko chalaina man·jana gita karkanarangko chipe donna Deputy Commissioner-na bilko on·angskaaha.
East Jaintia Hills a·jao Druk Fuels Limited-ni chalaienggipa karkanako damsako man·chape gimik damgittam karkanarangko East Jaintia Hills District Administration, pe·gale galmanahachim.
East Jaintia Hills a·jao gimik dam 34 coke karkanarangko pe·e galkugen ine adita salrangna skangsan Deputy Commissioner Abhilash Baranwal parakatahachim.
