TURA: Tura-ko Winter Capital songchina aro Reservation Roster-ko backlog policy-o ra·gatchina dabienggipani bidingo a·dokni Chief Minister Conrad K Sangma, Sombar salo dingtang dingtang dolrangko Tura-ni Circuit House-o gronge agangrikna parakatahaon, iani bidingo Circuit House-o ong·gija da·o ACHIK membor-rangni okumu chake jingjengatenggipa Tura-ni Mini Secretariat-osa grongechina gita A·chik Conscious Holistically Integrated Krima (ACHIK) dabiangskaaha.
Tura-ko Winter Capital songchina aro Reservation Roster-ko backlog policy-o ra·gatchina dabie ACHIK membor-rangni okumu chake jingjengatani da·o antigni ong·pilahachim ine nikna man·a.
Indake ong·engon, Winter Capital aro Reservation Roster-ni bidingo a·dokni Chief Minister, Garo Hills-ni dingtang dingtang dolrangko Sombar salo, Tura-ni Circuit House-o gronge agangrikna parakatani ja·man, ia tom·aniko Tura-ni Mini Secretariat-osa ong·atchina gita ACHIK dabiangskaaha.
Iani bidingo a·dokni Chief Minister Conrad Sangma-na sedoatengon, Tura-ni Mini Secretariat-ara Tura jillani bijangchio ong·e dingtang dingtang office-rangni sambao donggipaba ong·a aro ian dolgnini gisepo apsan asonge agangrikna gita nambatgipa biap ong·gen ine ACHIK-ni dilgiparang parakataha.
“Winter Capital aro backlog policy-ni bidingo agangrikaniko manderangni dongpaaniosa dakna nanga ine chinga bebera·a. Tura-ko Winter Capital songaniara Meghalaya a·dokko man·e on·chengdilgipa pagitchamrangni nangnikanian ong·a aro iako chu·sokgipa ong·atna gita chinga batanggimin sal 13-na okumu chake jingjengataha. Iako chu·sokgipa ong·atna ku·rachakaniko man·kujaskal chinga mikkangchiba apsan daken okumu chakangkugen. CM baksa tom·anio chinga okumu chakenggipa manderangsa aganna cholko man·na nanga aro ia agangrikaniko dakna gita Mini Secretariat-sa nambatgipa biap ong·enga,” ine a·dokni gitcham MCS officer aro ACHIK-ni membor Laben Ch Marak parakataha.
