SHILLONG: Re·anggipa Robibar salo, a·sel ong·anio saknaa man·gipa mandeko NEIGRIHMS-ni doctor aro nurse-rang name sanjahani a·selsa siangaha ine matnangenggipani bidingo report-ko NEIGRIHMS-ni director Nalin Mehta-oniko bi·ataha ine Sombar salo, a·dokni Health Minister Ampareen Lyngdoh parakataha.
Iani bidingo kobor ra·timgiparangna talataniko on·angengon, ia a·sel ong·anina an·tangni suk ong·gijaniko parakatenba, mikkangchi iandakgipa a·selrang ong·taijana gita ia a·selni bidingo name sandirokanirangko dakna nangenga ine Lyngdoh parakataha.
Lyngdoh-ni parakatani gitade, ia a·sel ong·ani attamo hospital-o junior doctor-rang dongachim aro medical officer-rang, sagipa manderangko niengachim.
“Ia a·selko tale ma·sie ra·na gita anga NEIGRIHMS-ni director-ko angna chu·gimik report-ko on·china u·iataha,” ine Lyngdoh aganaha.
Maming ja·kurangko de·na skangba ua NEIGRIHMS director-ni aganchakanina sengkugen ine janapatengon, ia a·sel ong·ani somoio saknaa man·gipa mandeko sanna gita doctor-rangde dongachim ine Health Minister parakataha.
Lyngdoh-ni parakatani gitade, NEIGRIGHMS-ara ma·mongni hospital-sa ong·a indiba iako a·dokon chalaiengani gimin a·dok sorkariba ia hospital-ko nirokgipa dake kamko ka·nade man·aiachim.
Ia a·sel ong·anio sianggipa mandeara namen dambesan ong·achim ineba ua an·tangni suk ong·gijaniko parakataha.
Re·anggipa Robibar salo, a·sel ong·anio saknaa man·gipa mande siangani ja·man, ia mandena hospital-ni doctor aro nurse-rang simsakjahani a·selsa siangna nangaha ine nokdangni manderang matnangtokahachim aro uandaken ja·mano NEIGRIHMS-ni emergency wing-o bewalan so·sojengjeng ong·aniko nikna man·angahachim.
Iandake manderangni so·sojengjeng ong·aniko namatna gita ja·mano ua biapona police-rangko okamatna gita nangahachim.
Koborko on·ani gitade, Robibar salo Umiam samba jolo a·sel ong·e saknaa man·gipa chadambeko NEIGRIHMS-ona rimangani ja·man una maming sanna bananiko on·gija emergency ward-o gale donaiaha ine sianggipa chadambeni ma·drangrang matnangtokengachim.
Indake ong·genchimoba iandake matnanganirangko NEIGRIHMS-ni official-rang jegalatskaenba, ia chadambeko uamang jokatna jotton ka·beahachim ine talataniko on·angskaahachim.
