WILLIAMNAGAR: Adita salrangna skang, East Garo Hills a·jani headquarter Williamnagar jillani ning·o donggipa Kusimkolgre gittimo, sub centre ba Health & Wellness Centre-ko a·dokni PHE Minister aro Williamnagar-ni MLA Marcuise N Marak-ni jakchi nokdonggae on·angaha aro ia sub-centre-ko nokdonggae on·anganio, East Garo Hills a·jani Deputy Commissioner Vibhor Aggarwal aro dingtang dingtang officer-rangba dongpae bak ra·angtokaha.
Ia Kusimkolgre Health & Wellness Centre-ko nokdonggae on·angani somoio a·dokni PHE Minister, jinmana aganprakangengon, ia health & wellness centre-ko kulianichi jolo songdongenggipa manderangna an·seng baljokani kamrangko sepangbatata gita ong·gnok aro ia manderangni koros ong·anirangkoba komiatna dakchakgnok ine parakangaha.
A·doko songdongenggipa manderangni namgnina sorkarini ra·gate on·enggipa dingtang dingtang kamrangni gimin janapangengon, a·doko songdongenggipa manderangna an·seng baljokanirangko on·na gita ia sorkari, a·dokni dingtang dingtang biaprango hospital-rangko aro health centre-rangko kulidape on·enga ine Marak parakataha.
