SHILLONG: National Education Policy (NEP) 2020-ko academic council-ni ra·chakchengani gri North Eastern Hill University (NEHU)-ni Vice Chancellor Prof Prabha Shankar Shukla-ni ra·gatna manchianiko Khasi Students Union (KSU) raken jegalataha.
“University-rango gital system-ko ra·gatna skang pangnan academic council-ni ra·chakaniko nangchongmota. NEHU-ni Vice Chancellor, NEP-ko skatang ra·gatgenchim ong·ode university-ni niamrangko pe·a gitasa ong·gnok,” ine KSU-ni assistant education secretary Riches Malngiang parakataha.
Malngiang-ni parakatani gitade, NEP-ko ra·gatna gita da·o dipet academic council-oni maming chanchia dongkujaengachim.
“University-ni niamrang aro gital curriculum-rangni giminsan academic council chanchirimaiahachim. Da·o dipet NEP-ko academic council-ba ra·chakkujaengani gimin chinga iako raken jegalangkuna tik ka·aha,” ine KSU-ni assistant education secretary aro KSU NEHU Unit-ni president parakataha.
Malngiang-ni parakatani gitade, NEP-ni namgni aro namgijanirangko nichenggijasa NEHU-ni VC, NEHU-o NEP-ko ra·gatna bil donga ine mesokna jotton ka·anisan ong·engachim.
“NEP-ni dingtang dingtang niamrangni bidingo college-rangna name talate on·chenggija maikai NEHU-o NEP-ko ra·gatna miksongenga?” ineba ua sing·doataha.
Meghalaya a·dokni college-rang NEP-ko ra·gatna tariama tarikuja uko a·dok sorkari sandie nikujaenga ine janapatengon, ia policy-ni gimin name sandichenggijasa sorkari NEP-ko ra·gatna jotton ka·ani gita ong·enga ine KSU-ni dilgipa matnangataha.
NEP-ko ra·gatgenchimode stream mingsarangchi chalaienggipa songadam nokadamrangni college-rangode bang·bea neng·nikanirangko chagrongna nangao ga·akgen ineba Malngiang, suk ong·gijaniko parakataha.
