TURA: Tura-o Governor’s House-ko rikanian Tura-ko Winter ba Second Capital songna chol donganiko mesokani ong·achim ine New Tura Development Forum (NTDF) parakatenba, Tura-ko Winter/Second Capital songna gita maming ja·kurangko de·jaengani gimin a·dok sorkarini kamna suk ong·gijaniko parakataha.
“Tura-ko Winter/Second Capital songna gita nangchakegipa pilak kamrangkon ka·engahaoba iani bidingo a·dok sorkari ja·kurangko de·chakatjaengani gimin chinga NTDF namen suk ong·ja. Tura-ko Winter/Second Capital songna nangchakegipa kamrangoni mongsonggipara Tura-o Governor-ni nokko rikanian ong·achim. Tura-o Governor-ni nokko rikna gita 2009 bilsini September jaon gong kror 5.75 tangkarangko chamanahachim indiba kamrangko matchotgija galchipani ja·man, bangki kamrangna aro Staff Quarter-rangna gong kror 10.98 korosrangko chamtaiaha. Tura-o ia Governor-ni nokko rikna gita indita tangka paisarangko chamanian Tura-ko Winter/Second Capital songna chol on·aniko mesokani sakki ong·engachim,” ine NTDF-ni general secretary LC Momin parakataha.
Tura-ko Winter/Second Capital songani bidingo maming jera ra·grikani aro pa·sikani gri ta·raken iani bidingo jinmana parakatchina gita sorkariko didiatengon, Tura-ko Winter/Second Capital songna cholrang dongjagenchim ong·ode mai miksonganiosa Tura-o Governor’s House-ko rikenga ine NTDF sing·doataha.
Tura-ko Winter/Second Capital songchina dabianiara kraani ong·ja, Tura-ko Winter Capital songchina dabigenchimode gipin jolrangba apsan daken Spring/Autumn Capital-rangna dabiskagen, Meghalaya a·dokara skotong songjinma damgni dongna gita chonbegipa a·doksan ong·a aro uandake pa·sikanirangko jegalatengon, “Tura-ko Winter Capital songchina dabianiara gital dabiani ong·ja indiba ian an·chingna a·dokko man·e on·na gita rakbee kamrangko ka·dilanggipa pagitchamrangni nangnike songgigrikgiminsa ong·a. Uni gimin an·ching an·chingni pagitchamrangna grorang donggipa ong·e da·alo Tura-ko Winter/Second Capital songanichi uamangko mande ra·pilskana nangchongmotenga,” ine Momin parakataha.