Winter Capital aro Job Reservation-ni gimin CM baksa agangrikanio so·sojengjeng ong·a

TURA: Sombar attamo, Garo Hills-ni A·chik Conscious Holistically Integrated Krima (ACHIK) aro dingtang dingtang dolrang baksa a·dokni Chief Minister Conrad K Sangma, Tura-ko Winter Capital songchina aro Reservation Policy-ni roster system-ko nipilani gnang ra·gatchina dabienggipani bidingo Tura-ni Mini Secretariat-o agangrikengmiting somoio rang·san ka·a ding·chaoenggipa manderang, Mini Secretariat ning·achi napna jotton ka·e aro ro·ongrangko goani a·sel adita so·sojengjeng ong·angaha.
Ua somoio a·dokni Chief Minister Conrad K Sangma baksana a·dokni PHE Minister Marcuise N Marak-ba Mini Secretariat-o dongachim aro a·palo manderangni ka·a ding·chaoe ro·ongrangko goani a·sel aro ramako wa·alrangchi so·e champengatani a·sel ua biapon dongna gita nangahachim.
Manderangni ro·ongrangko goe chadrapanio komibeoba police sakbonga saknaanirangko man·na gita nangaha aro walona kingkingan ua biapo manderangni chrik a·boke ro·ong goanirangko nikna man·aha.
Koborko on·ani gitade, ua biapo okumu chake jingjengatenggipa manderangna donenggipa ambulance-koba manderang ka·a ding·chaoe ro·ongrangchi goaha aro ja·mano ia ambulance-ko wa·al so·chipe galaha.
Ua biapo okumu chake jingjengatenggipa manderangni dongchakenggipa pandalkomangba ia manderang so·e galaha ine kobor on·aha.
Iandake so·sojengjeng ong·anirang batroroangahani gimin ja·mano ua biapona bang·bea police aro CRPF-ni sipairangkoba watataha aro manderangko katatna gita ja·mano tear gas-rangko goaha.
Koborko man·soani gitade, ia golmalko a·bachengatgipa manderangoni saksaba okumu chake jingjengatenggipa manderangko grongea dongkujachim indiba Sombar attamo rang·gitik hajalni hajal manderang ka·a ding·chaoe ua biapona re·angenba, Chief Minister baksa agangrikengmiting somoion golmal ong·atna a·bachengaha.
Tura-ko Winter Capital songchina aro Reservation Roster-ko backlog policy-o ra·gatchina dabie ACHIK, GSMC aro uandakgipa dingtang dingtang dolni dilgiparang batanggimin sal 14-mangna Tura-ni Mini Secretariat mikkango okumu chake jingjengatengachim ine nikna man·a.