WILLIAMNAGAR: Tura-ko Winter/Second Capital songchina dabianirang bilakbatroroengbaengon, East Garo Hills a·jao gari para sale cha·enggipa manderangba East Garo Hills All Commercial Vehicles Association (EGHACVA)-ni ning·o salsana, chong·motan July-ni 26 tarik Budbar salo, East Garo Hills a·ja gimikon gari gora salruraaniko dontonge jingjengatanggen ine parakataha.
Iani bidingo East Garo Hills a·jani Deputy Commissioner-na seachi u·iatengon, Meghalaya a·dokko man·e on·dilchenggipa pagitchamrangni songgigrikanio pangchake da·o Tura-ko Winter ba Second Capital songchina dabienba mitam dilgiparang okumu chake jingjengattokenga indiba a·dok sorkari, Garo Hills-ni manderangna uamangni man·gnikon on·na gisik nangjaenga ine EGHAVCA janapatenba, iani giminsa uamangba ia dabianio bakrimaniko mesokna gita salsana garirangko salgija jingjengatna manchiaha ine parakataha.
“Tura-ko Winter Capital songchina dabianiara maming gital dabiani ong·ja indiba a·dokko man·e on·dilanggipa pagitchamrangni songgigrike donanggimin bak rengsiko bi·anisan ong·enga. Iani bidingon Tura-o chingni jong-ada no-abirang sal 14 batpile okumu chake jingjengattokenga indiba sorkari, uamangni duk chakaniko niatna gisiko nangjaenga. Da·alo Garo Hills gimikon manderang an·tangtangni man·gnina ku·rang on·batokengaha aro salsabatroro ku·rangrangba rakbaroroengaha. Uni gimin chingaba ia dabianio bakrimaniko mesokna July 26 tariko salsana East Garo Hills a·ja gimikon chinga gari para salaniko dontongna tik ka·aha,” ine EGHAVCA-ni dilgiparang parakataha.
Ia salo East Garo Hills a·ja gimikon bostu aro manderangko salruragipa garirang re·rurajawa ine u·iatengon, ia salsana East Garo Hills a·jani manderangkoba chakchikchina gita association-ni dilgiparang mol·molataha.
