TURA: Re·anggipa Sombar attamo, Tura-ko Winter Capital songchina aro Reservation Policy-ni Roster system-ko backlog policy-o ra·gatchina dabienggipani bidingo a·dokni Chief Minister Conrad Sangma, dingtang dingtang dolrangko gronge agangrikengmiting somoio rang·san so·sojengjeng ong·angani ja·man so·sojengjeng ong·aniko chel·chakna gita West Garo Hills a·jani District Magistrate, Tura-o Section 144 CrPC-ko ra·gatenba Mongolbar pring 5:00 bajiona chu·gimik curfew-ko ra·gatangaha aro chu dokkanrangkoba July-ni 25 aro 26 tarikrango salgnina chipchina ge·etaniko on·ataha.
Tura jillani ning·o donggipa petrol pump-rangkoba Mongolbar salode chu·gimik chipe donattokaha indiba July-ni 26 aro 27 tarikrangode sipai dolrangni nirokanio pring 9:00 bajioni attam 2:00 bajiona kulina gita District Magistrate ge·etaniko on·ataha. Petrol-rangko palengon, magistrate aro sipai dolrangna agrede jerry can-rango ba uandakgipa ruchakanirango paljachina aro litre 10-na bate paljachina gita District Magistrate ge·etaniko on·angaha.
Gari tarigipa garage ba workshop-rango tyre-rangko ning·ao name chipe donchina gitaba District Magistrate ge·etaniko on·ataha.
Tura jillao Section 144 CrPC-ko ra·gatahani gimin je biaprangoba mande sakbonga ba una bate tom·bimonganiko aro ma·manti silchidare ra·bitanikoba champengataha.