TURA: Sombar attamo, Tura-ko Winter Capital songchina aro Reservation Policy-ni roster system-ko backlog policy-o ra·gatchina dabienggipani bidingo dingtang dingtang dolrang baksa a·dokni Chief Minister Conrad Sangma-ni Chief Minister Office (CMO)-o tom·e agangrikengmiting somoio ro·ongrangko goe aro garirangko so·chipe so·sojengjeng ong·atani bidingo Tura-ni police-rang, Trinamool Congress (TMC)-ni youth leader Richard M Marak-ko Mongolbar salo rim·aha.
Re·anggipa Sombar attamo, Garo Hills-ni A·chik Conscious Holistically Integrated Krima (ACHIK) aro dingtang dingtang dolrang baksa a·dokni Chief Minister Conrad K Sangma, Tura-ko Winter Capital songchina aro Reservation Policy-ni roster system-ko nipilani gnang ra·gatchina dabienggipani bidingo Tura-ni Mini Secretariat ba CMO-o agangrikengmiting somoio rang·san ka·a ding·chaoenggipa manderang, Mini Secretariat ning·achi napna jotton ka·e ro·ongrangkoba goahachim ine nikna man·a.
Indake ong·engon, ia so·sojengjeng ong·atanio jak donggipa sak 18 manderangko rim·ani ja·man police-rang, TMC-ni chadambe dolko dilgipa Richard Marak-koba Mongolbar salo rim·aha.
Richard Marak-ko rim·na skang police-rang, BJP aro TMC-ni sak 18 membor-rangko rim·aha aro ia sak 18 manderangoni sakgnide BJP Mahila Morcha-ni member-rang ong·a ine police-rang parakataha.
Rim·ako man·gipa BJP Mahila morcha-ni membor sakgniara Tura Dobasipara-oni bilsi 32 ong·gipa Bellina M Marak aro Tura Akonggre-oni bilsi 40 ong·gipa Dilche Ch Marak mang ong·achim.
Police-rangni u·iatani gitade, so·sojengjeng ong·atna gita manderangko didigipa mande saksakode video-rangoniko nikrikna man·aha aro ia mandeara TMC-ni Salseng R Marak ong·achim indiba uko kate dongengani a·sel rim·na man·kujaengachim.
