SHILLONG: Sombar attamo, Chief Minister Conrad Sangma-ni NGO-rang baksa Chief Minister’s Office (CMO)-o tom·e agangrikengmiting somoio mitam manderangni chadrapaniara, a·dokni Chief Minister-kon chadrapna miksongmanchae dakanisa ong·achim ine Mongolbar salo, a·dokni Director General of Police (DGP) LR Bishnoi parakataha.
DGP-ni press conference-o kobor ra·timgiparangna parakatani gitade, July-ni 23 tarikon so·sojengjeng ong·atgipa manderangna tangkarangko sualahachim aro so·sojengjeng ong·atgipa manderangna churangkoba sualahachim.
So·sojengjeng ong·anio gimik bol 21 garirang nosto ka·ako man·aha ine janapatengon, ia bol 21 garirangoni bolbrikode so·sojengjeng ong·atgipa manderang so·aha aro bol 17-de ro·ongrangko goani a·sel nosto ong·atako man·aha ine Bishnoi parakataha.
So·sojengjeng ong·anio saknaa man·gipa manderangni gimin janapatskaengon, ia a·sel ong·anio gimik sak 18 manderang saknaanirangko man·na nangaha aro ia sak 18-oni sak 10-de Meghalaya Police-ni saksade home guard aro sak 7-de CRPF sipairang ong·achim ine DGP parakataha.
“A·dokni Chief Minister, attam 3:15 bajimangoni NGO-rang baksa tom·e agangrikna a·bachengaha aro attamni 5:45 bajimangona tom·aha. Ian Tura-ko Winter Capital songchina aro Reservation Policy-ni bidingo chanchirimanisa ong·ani gimin adita somoirang nangaha. Ua somoio pilak dolrangan tom·tomaosa Chief Minister baksa agangrikengachim indiba rang·gitik manderang jinma chrik a·bokna a·bachengahani gimin mitam dolni dilgiparang a·palona ong·katange, manderangko tom·tomatna jotton ka·ahachim indiba badiaba dolni manderang, uamangni dilgiparangkon manigija ro·ong gona a·bachengaha,” ine Bishnoi aganaha.
Chief Minister-ni Office (CMO)-ko ro·ongrangchi goe chadrapanio jak donggipa sak 26 manderangkode police-rang ma·simanaha aro ia sak 26 manderangoni Richard Marak-ko man·chape gimik sak 19 manderangko rim·na man·aha ineba DGP parakataha.
Tura-o so·sojengjeng ong·aniara CM-ko chadrapna miksonge dakanisa: DGP
Date:
Share post:
