TURA: West Garo Hills a·jao skanggipa changna Garo Hills gimikni Gram Sevak aro Sevikarangna ‘Transformation’-ni bidingo salsani workshop-ko Budbar salo, Rongram C&RD Block-ni ning·o donggipa Asananggre-o ong·atangaha.
Ia workshop-ko Meghalaya sorkarini Community & Rural Development Department, Meghalaya State Institute of Rural Development (SIRD) aro All Garo Hills Gram Sevak & Sevikas Association (AGHGSA) nangrime ong·atangaha.
Ia workshop-ko ong·atanio C&RD department-ni Principal Secretary Sampath Kumar, Garo Hills-ni Gram Sevak aro Sevikarangna aganprakengon, Garo Hills-ni manderangna nambate dangdike on·na an·tangtangni kamrango dingtanganiko ra·bana ia workshop-ko ong·atchina ku·pattiahani gimin Gram Sevak & Sevikas Association-ko mittelpilangenba, songo noko Gram Sevak-rangni on·gilenggipa kamrangni gimin talate on·angaha.
Jolo donggipa me·chik dolrangko tang·doatna ka·enggipa kamrangni gimin aganangengon, ia jolrango donggipa me·chik dolrangko didianichi batanggimin bilsi bongani gisepo dol 45,000-mangni gita Self Help Group (SHG)-rangko bikotna man·aha ine Kumar parakataha.
An·tangtangni kamrangko nambatatna aro mikkangchi ia jolrango kangal cha·asianirangko komiatna gita an·tangtangko gital dake on·kangtaienba kamrangko ka·angchina gitaba ua Gram Sevak aro Sevikarangko didiangaha.
Ia workshop-ko ong·atanio SIRD-ni Director Sanme R Marak-ba jinmana aganprakangengon, Gram Sevak aro Sevikarangni dakna nanggni kamrangko talate on·angenba, uamangan songadam nokadamrango songdongenggipa manderangni janggi tanganiko namdapatanio mongsonggipa kamrangko ka·giparang ong·a ine parakataha.
Ia workshop-ko ong·atanio jinmana aganprakanggipa gipin manderangara, SIRD-ni Faculty Liselda Dkhar, AGHGSA-ni general secretary VM Marak, AGHGSA-ni president Bilman Marak aro gipinrang ong·a.
