TURA: Tura-o so·sojengjeng ong·anina Trinamool Congress (TMC)-ni dilgipa Richard M Marak-ko rim·ani ja·man, ia so·sojengjeng ong·anio uni segipa maming dakeba jak dongja ine Richard jikgipa Jigame Marak a·kangatskaaha.
Jigame Marak-ni kobor ra·timgiparangna parakatani gitade, ia a·sel ong·ani somoio uko Mission Hospital-oniko watdaldal ong·e uni segipa Richard Marak-ba salgimikan unbaksa dongachim.
“Ia a·sel ong·anio angni segipa maming dakeba jak dongja maina ua salgimikan ang baksasachim. Ua salo ua nokonin ong·kata dongjachim aro iako chingni noksulrangba sakki on·na man·aigen. Iako angni aganengani miksongade adita salrangna skang angko operate ka·e Sombar attamni 1:00 bajimangosa angko Mission Hospital-oniko watpilaha. Angni nokona sokangan intalan ua angna simsak nirokanirangko on·engachim indiba maikai ua ia so·sojengjeng ong·anio jak dongna man·a?” ine Marak sing·doataha.
Sombar salo ong·gipa a·selni giminsa Richard-ko rim·aha ong·ode ua iano maming dakeba jak dongjachim ineba uni jikgipa talataniko on·angaha.
“Angko Sukrobar salo hospital-o admit ka·aha aro Sonibar salo operate ka·aha. Uni ja·man Sombar salo angko hospital-oniko watpilaha aro ua somoi gimikon ua ang baksa dongachim. Iako pilakan sakki on·na man·aigen,” ine Jigame Marak aganaha.
Tura-ko Winter Capital songchina aro Job Reservation-ni roster system-ko backlog policy-o ra·gatchina dabie jingjengatenggipani gimin janapatskaengon, dingtang dingtang NGO-ni membor-rang jatgimikni namgninasa okumu chake jingjengataha aro ian badiaba political dolrangni kam ong·ja ine Marak parakataha.
Jigame Marak-ni parakatani gitade, Richard-ko rim·ani giminba police-rang, una maming a·selrangko talate on·na man·kujaengachim.
“Richard-ko rim·ani ja·man angni police station-ona re·angon, anga uko lock up-o chipakosa nieaha aro iani gimin police-rango sing·on, ian SP-ni kamsa ong·a aro uamangde mamingkoba ma·sija inesa police officer-rang aganchakaiaha,” ine Marak aganaha.
Richard-ko ong·gija kamko ka·gipa mande gitasa komibeoba sak 30-mangni gita police-rang, uni nokona re·ange rim·eaha ineba ua an·tangni suk ong·gijaniko parakataha.
