SHILLONG: Re·anggipa Sombar attamo, Tura-ni Chief Minister’s Office (CMO) ba Mini Secretariat-o dingtang dingtang dolrang baksa Chief Minister-ni tom·e agangrikengmiting somoio so·sojengjeng ong·anina Trinamool Congress (TMC)-ni dilgipa Richard M Marak-ko man·chape baditaba sak manderangko rim·ani ja·man ia manderangko police-rang, political dilgiparangni ge·etaniko man·esa rim·aha ine TMC-ni dilgipa Mukul M Sangma matnangataha.
Ia a·selni bidingo a·dokni Director General of Police (DGP), media-na talate on·na skangan rim·a man·gipa manderangko, political dolrangni biming baksa manderangna mesokatahani giminba ua West Garo Hills a·jani SP-ko sing·doataha.
Ia jingjengtataniko sawarang ong·atahachim aro Garo Hills gimikni manderangko sawa okamatahachim, uarangko SP name am·sandichengna nangachim ineba Sangma parakataha.
“Rim·a man·gipa manderangni gisepo bilsi 18 aro bilsi 21 ong·gipa chadamberangba donga. Ia chadamberangara badiaba political dolrang baksa bak donggipa ong·achimma?” ine Sangma sing·doataha.
Political dilgiparangni pal ku·rang on·timgiparang gita kam ka·jachina Tura Police-ko didiatengon, kakket bichalko on·na kamko ka·anio police-rangan mongsonggipa bak ong·a aro badiaba political dolko jaksi otnasa jotton ka·giparang ong·na nangja ine TMC-ni dilgipa parakataha.
Sangma-ni parakatani gitade, an·tangtangko chel·chakna gita police-rang, rim·a man·gipa manderangni bimingrangko jinmana parakatani ja·mansa Richard Marak-ko rim·aha.
Ia chu·gimik obostani bidingo jakgitele sandirokaniko dakchina dabiangengon, an·tangtangko ostrorang gita jakkalna on·enga ine Sangma, police-rangko matnangataha.
“Ua biapo donggipa sak hajal hajal manderangoniko police-rang, TMC aro BJP-o bak ong·gipa sak 18-19 manderangkosan ma·sina man·aiaha,” ine Sangma aganaha.
Ia a·selni bidingo TMC, ainni gita ja·kuko de·anggen ine janapatengon, police-rangni iandakgipa ja·kuko de·aniara a·dokni manderangko kenatna dakanisan ong·aia ine Sangma matnangataha.