TURA: Tura-ni Chief Minister’s Office (CMO) ba Mini Secretariat-ko ro·ongrangchi gona aro ua biapo donggipa pandalrangko wa·al so·na gita manderangko ding·chaoatanio mongsonggipa ong·e jak donggipa Salseng R Marak-ko police-rang, Damalgre-oniko rim·na man·aha ine kobor on·aha.
Tura-ko Winter Capital songchina aro Reservation Policy-ni roster system-ko backlog policy-o ra·gatchina dabienggipani bidingo a·dokni Chief Minister Conrad K Sangma, Sombar attamo dingtang dingtang dolrang baksa Mini Secretariat-o agangrikengmiting somoio ia mandean, a·palo senge dongenggipa manderangko ding·chaoatenba, ro·ongrangko gona aro wa·alrangko so·na didiahachim ine nikna man·a.
Ia a·sel ong·ani ja·man, so·sojengjeng ong·atanio jak donggipa adita sak manderangko rim·na man·ahaoba, unsalo manderangko ding·chaoatgipa Salseng Marak-de kate dongengani a·sel police-rang rim·na man·kujaengachim.
Indake ong·genchimoba, ia mandeni gimin koborko man·soa bakan police-rang, ia mandeko rim·na re·angon, ua police-rangoni kate jokna jotton ka·taiahachim indiba ua police-rangoni joke katna man·jaha ine kobor on·aha.
Indake ong·engon, NPP-na kam ka·gipa mande saksa, jekon Jackson A Sangma ine mingachim, ukoba unsalo, so·sojengjeng ong·atanio jak dongani gimin police-rang rim·aha ine kobor on·aha.
Koborko on·ani gitade, rim·ako man·gipa Jackson Sangma-ra Tura Dakopgre jolo donggipa Nikwatgre gittimoni ong·a aro unsalo uaba manderangko ding·chaoatna gita kragija kattarangko aganahachim.
So·sojengjeng ong·atanio jak donganina police-rangni rim·gipa manderang da·o dipet gimik sak 35 gapengaha ineba kobor on·aha.
Police-rangni u·iatani gitade, rim·ako man·gipa gimik sak 35 manderangoni saksade songsalna kamko ka·gipa Jaynie Ningring N Sangma aro saksade home guard volunteer ong·achim.