SHILLONG: Jackfruit Mission-ko ra·gatanichi Meghalaya a·doko te·brong bading chiwale cha·enggipa manderangna man·dapanikosan ong·aigija game ge·e cha·enggipa manderangni janggi tanganikoba namdapatna man·aha ine nikahani gimin Meghalaya sorkari, Jackfruit Mission-ko ra·dodapatna miksonganirang dongenga.
Bilsi bongana ra·gatgipa Jackfruit Mission 1.0-ko 2018 bilsio MDA-I sorkari a·bachengatahachim aro da·o ian bon·kamgipa bilsi ong·engahachim.
Bristibar salo salsana Shillong songjinmani State Convention Centre-o ong·atanggipa ‘Jack Start 2023’ sale program-ko a·bachengate on·angani ja·man kobor ra·timgipa manderang baksa agangrikengon, a·dokni je kamoba kamko dontongatgija ra·dorikrikna man·o nambata aro bilsi bongani gisepo ia mission-chi bading chiwalani tang·doaniko sorkari hisapna gita chu·ongjaengani gimin ia mission-koba ra·dodapna nangenga ine Lyngdoh parakataha.
Ia program-ko ong·atanio ua farmer producer group-rang baksa agan-golpogrikna man·aha ine janapatengon, uamang baksa agangrikanio da·o bading chiwalenggipa manderang salprakon gong 10,000-oni gong 15,000-mangko man·enga ine ma·sina man·aha ine Agriculture Minister parakataha.
Ia program-na tangka paisarangko chamdape on·anichi re·baenggipa bilsio Jackfruit Mission 2.0-ko a·bachengatna man·ama man·jawa ua Chief Minister Conrad K Sangma baksa agangrikgen ineba Lyngdoh parakataha.
Jackfruit Mission 1.0-na gong kror 20 tangkarangko bi·atahachim indiba gong kror 5 tangkarangkosan sorkari on·na man·aiaha ineba Lyngdoh parakataha.
