AMPATI: South West Garo Hills a·jaoba Azadi ka Amrit Mahotsav-ko manina siengani gimin dingtang dingtang program-rangko tarisamsona gita Bristibar salo, dingtangmancha South West Garo Hills a·jani Deputy Commissioner RP Marak-ni dilanichi, dingtang dingtang department-ni officer-rang baksa Ampati-ni Circuit House-o tom·aniko ong·atangaha.
Ia tom·anio block damgittamni Block Development Officer (BDO)-rang aro dingtang dingtang department-ni officer-rangba bakko ra·angtokaha.
Ia Azadi ka Amrit Mahotsav-ara India a·songni jakgitelko man·aoni bilsi 75 gapaniko maniani ong·engani gimin ia manianio a·songni jakgitelanina an·tangtangko on·kange dakgrikdilanggipa pagitchamrangko mande ra·pilasan ong·aigija South West Garo Hills a·jao songdongenggipa manderangna dingtang dingtang program-rangko ong·atani bidingo ia tom·anio chanchirimangaha.
Ia Azadi ka Amrit Mahotsav-ko manina gita tik ka·gimin program-rangara ‘Dedication of Memorial’ ba a·songni jakgitelanina an·tangtangko on·kange dakgrikdilgipa pagitchamrangko mande ra·pilskana tom·ani, ‘Panch Pran Pledge’ ba a·jao songdongenggipa manderangni tom·tomana ku·mikchetani, ‘Vasudha Vandhan (@75 Saplings)’ ba tangsekgilgilgipa a·songko ong·atna gittim antion pang 75 bol chararangko ge·ani, ‘Veron ka Vandhan’ ba a·jani budepa butchumarangna mande ra·pilskaani, A·songni nisanko songe ring·mittelani aro block-tangtangoba dingtang dingtang program-rangko ong·atanggen.
Indake ong·engon, India a·songni ku·mong nangrimaniko aro dingtang dingtang jat aro toromrangni meli nangrime donganiko mesokna gita songtangtango seokako man·gipa chadamberang, songtangtangni a·arangko chimongbaenba ia a·arangko a·songni skotong Delhi songjinmaona watatgen.
Ia Azadi ka Amrit Mahotsav-ni final event ba bon·kamgipa program-ko Delhi-o ong·atanioba South West Garo Hills a·jaoni seokako man·gipa dolsa chadamberang re·ange bakko ra·ena gita man·gen.
