SHILLONG: Meghalaya a·dokona re·baenggipa tourist-rang batroroengani gimin tourist-rangko sokachakna gita Meghalaya sorkari, te 1000 homestay-rangko kulidapna cholrangko on·gen ine Sukrobar salo, a·dokni Tourism Minister Paul Lyngdoh parakataha.
New Shillong Township-o five-star hotel-ko kulina gita a·arang dongkuenga ineba Tourism Minister parakataha.
Shillong-ona bang·bate tourist-rangni sokbaengani a·sel ramarango apchangket ong·anirang batroroengani gimin janapatskaengon, iani bidingo cholko sandina gita Meghalaya aro Assam-ni Police-rang apsan chanchirimgen ine Lyngdoh parakataha.
Shillong songjinmao gari gorarang apchangket ong·jana gita dingtang dingtang a·dokrangona re·enggipa tourist taxi-rangna sorkari, dingtang ramako sandienga ineba Tourism Minister parakataha.
Lyngdoh-ni parakatani gitade, tourist taxi-rangna Umiam-Mawlyndep ramaba namgipa chol ong·enga indiba ia ramako da·osa tariengmiting.
Umiam aro Sohra-o bakan sorkari, gital resort-rangko kulignok ineba Tourism Minister parakataha.