SHILLONG: Manipur a·doko me·chikrangni kosako ong·gija dakaniko jegalna aro tom·tomaniko ra·bapilchina bi·na gita re·baenggipa August-ni 5 tariko Shillong-ni Catholic Association, dingtangmancha jinma tom·tome re·jomaniko ong·atenga.
Iani bidingo u·iataniko on·angengon, jinma re·jomaniko Madan Iewrynghep-oni a·bachenge Don Bosco Stadium-o matchotatgen ine Shillong-ni Archbishop Victor Lyngdoh parakataha.
“Batanggimin jarangoba chinga a·gilsako tom·tomanina bi·aha aro Manipur a·doko tom·tomaniko man·pilchina gitaba dingtangmancha bi·aha. Manipur a·doko so·sojengjeng ong·anirangko nikna man·engon, me·chikrangni kosako ong·gija dakanirangko, nokrangko so·e galanirangko, olakkiram nokrangko nosto ka·anirangko aro manderangni siani aro katbrangna nanganirangko nikna man·engani gimin Manipur a·doko tom·tomani sokbapilchina gita an·ching pilakan bi·aniko dontongkujana,” ine Shillong-ni Archbishop parakataha.
Ia jinma re·jomaniko ong·atanio pilakkon bak ra·echina gita didiatengon, skia man·gipa manderangni songsalo saksa sakgipinko mande ra·grikna aro ka·sagrikna gita association mol·molenga ine Archbishop parakataha.
