SHILLONG: Re·anggipa Sombar attamo, dingtang dingtang dolrang baksa Chief Minister-ni tom·e agangrikengmiting somoio rang·san ro·ongrangko goe aro wa·alrangko so·e so·sojengjeng ong·atgipani bidingo sorkari, police-rangni report-rango pangchakesa da·o minggipin ja·kurangko de·anggen ine Sukrobar salo, a·dokni Chief Minister Conrad K Sangma parakataha.
Ia a·selni bidingo police-rangko dos galaniara kraani ong·ja ine janapatengon, ua somoiko uko aro Mini Secretariat-o dongpagipa pilak NGO-ni dilgiparangko mikkango donge chel·chakgiparangara police-rangan ong·achim ine Sangma parakataha.
Chief Minister-ni parakatani gitade, ua somoio ro·ongrangko goe uamangko saknaatna jotton ka·gipa manderangara a·palosachim aro ia manderangara sawamanchachim, ja·mano ma·sina man·aigen.
Meghalaya a·dokni gitcham Chief Minister Mukul Sangma-ni ia a·selna police-rangko matnangahani gimin an·tangni suk ong·gijaniko parakatengon, ua saksa gitcham chief minister ong·e police-rangni daitorangko ma·sina nangachim ine Sangma aganaha.
“Sakkirango pangchakesa da·o dipet police-rang ja·kurangko de·aha aro ia a·selo jak donggipa mitam manderangara political dolrango jak donggiparang ong·achim ine ma·sina man·aha. Indiba angni agangimin gita, ian uamangko badiaba political dolni membor ong·ani giminde rim·a ong·ja indiba uamangko ma·siahani giminsa sakkirango pangchake rim·aha,” ine Chief Minister aganaha.
Ia a·selna rim·ako man·gipa sakantian video-rango donga aro video-rangoniko nikna man·ani gitade, uamang rakgipa kattarangchi manderangko ding·chaoataha ineba Sangma parakataha.
“Manderangko Facebook aro gipin social media-rang gitaba didiaha aro sandirokanio man·ani gitade, uamang an·tangtangni political dilgiparangni ge·etaniosa iarangko dakaha,” ine Chief Minister aganaha.
Uko chel·chakgipa sipairangko dingtangatengama ine sing·anina aganchakaniko on·angskaengon, ia a·sel ong·ani salgipinon a·dokni DGP LR Bishnoi, uko grongeaha ine Chief Minister parakataha.
