Shillong: National Education Policy 2020-ko ra·gatanio chagronggipa neng·nikarango bak dake kam ka·anggen ine Chief Minister, Conrad K. Sangma, Sonibar salo aganaha.
“Ia bilsini gisepon jedakgipa neng·nikarang donga, uarangko namatgen. Angni chanchiani gitade, chanchie donsogiminko chu·sokatna man·aigen.”
NEP 2020-ko ra·gatna jechaka ba jegalani kattaan dongja, indiba policy-ko ra·gatanio neng·nikanide, bilsi brini course ong·ani gimin, infrastructure-ko namdapatchengna nangenga. Iarangna agreba bang·bate kam ka·giparangko nanggen aro multidisciplinary course-ko a·bachengna nanggen, ine CM aganaha.
“Bang·bate professors, lectures aro academic manderangko nanggen. Policy-ko jegalani katta dongja. Indiba policy-ko ra·gatanio chu·sokatna ra·bianirang dongani gimin bang·bate tangka-paisarangko nanggen.”
College-tangtangde ia policy-ko ra·gatna man·jawa, uni gimin bang·a collegerang baksa agangrikaha aro uamangko dakchakna kam ka·enga ine Sangma aganaha.
A·dok sorkari, policy-ko ra·gatna re·mikkangenga. Gimik academician aro college-rangan policy-ko ra·gatna namniktokaha maina ian chu·gimik education system-o namdapaniko ra·bagen. NEP 2020, an·chingni chadamberangko mikkangchina nambate tarianggen, ineba CM Sangma aganangaha.
