Shillong: Lok Sabha-ni Speaker Om Birla, Meghalaya Shillong-ona Commonwealth Parliamentary Association (CPA)-ni 20-gipa annual Conference-ona bak ra·na gita Shillong-ona sokbae, Sonibar salo conference-o bak ra·mitingo, “salgro-salaram a·jolo tom·tomaniko rakkina mol·molangaha.
Conference-o matchote kobor ra·timgiparang baksa agangrikmitingo Speaker Om Birla, Manipur-ni mamlao janapangaon, “Development-ko ra·baanio tom·tomanian skanggipa ja·ku ong·a, uni gimin anga Northeast ba salgro-salaram a·jolni manderang pilakkon tom·tomaniko rakkina mol·molata” ine aganaha.
Commonwealth Parliamentary Association (CPA), India Region, Zone III-ni chang 20gipa Annual Conference-ko Lok Sabha-ni Speaker Om Birla-na oprakate on·aha, aro salgro-salaram a·jolo jedakgipa obosta ong·aha, uan ong·na nangjachim, ine aganaha.
“Anga a·songni gimik bakrango tom·tomaniko nikna nangnika. A·doko ba a·songo tom·tomaniko rakkianiara songdonggipa sakanti manderangni daito ong·a. Tom·tomani dongosa, a·dok aro a·song chu·gimik namroro-silrorona man·a,” ine Lok Sabha Speaker aganaha.
Iarangni gisepon Speaker Birla, climate change-ni giminba aganprakangaha. Aro conference-o climate change-ni gimin aditan kattarangko chanchirimna nangenga ine janapate, salgro-salaram a·jolrangko damsa damgipin baksa nangdimatna nangnikaniko aganangaha.
Niatgenchimode Northeast-o aditan namroro-silroroaniko nikna man·engjok, gipin a·dokrango gitan Northeast-ba tang·doenga. Prime Minister Narendra Modi-ni dilanio Northeast-san ong·aija a·songni gimik bakrangan silroroenga. India-o donggipa manderangni bewalrangara namen ongipa ong·a, samtangtango donggipa buring-bolgrim, do·o-matrang aro man·telgaigipa gamjinrang baksa janggi tanggipa ong·a. Uni gimin development-ba climate-friendly ong·na nanga, ine Speaker aganaha.
Northeast-o development-ko ra·bana ma·mong, dingtang dingtang project-rang jekai- PM Gati Shakti, National Highway-ko dal·atdapa, UDAN Scheme, telecom sector, inland waterways, forest sanctuaries ba uandakgiparangko ra·baaha.
Uandake Om Birla, gitcham Lok Sabha Speaker aro Meghalaya-ni gitcham Prime Minister PA Sangma sagini a·dokna aro a·songna on·gilaniko gisik ra·angaha.
Chang 20-gipa Annual Conference of CPA, India Region, Zone III-ko Shillong, Rilbong-ni Meghalaya Legislative Assembly-o ong·atenga.
Chief Minister, Conrad K. Sangma, Deputy Chairman Rajya Sabha, Harivansh Narayan Singh, Meghalaya Legislative Assembly-ni Speaker Thomas A. Sangma, Arunachal Pradesh Legislative Assembly-ni Speaker aro Chairman, CPA India Region, Zone III, Shri Pasang D. Sona aro gipinrang conference-o bak ra·angaha.
Salgnina ong·atenggipa conference-o mingni mongsonggipa topics – Natural Disasters aro NE-ko a·songni gipin bakrang baksa nangdimatani bidingo chanchirimenga.
Conference-ni bon·kamgipa sal July 30 tariko Meghalaya-ni Governor Phagu Chauhan aganprakgen aro cultural programko ong·ate matchotatgen.
