Tura-o golmal ong·gipako jakgitele am·sandichina Charles Pyngrope agana

Shillong: Tura-o golmal ong·gipani bidingo kakketko jakgitele am·sandianiko dakangna nanga ine TMC state president, Charles Pyngrope aganangaha.
“Angni bilake chanchianio, jakgitele am·sandiani Meghalaya manderang baksa name dake re·angna man·chongmotgen, chingni ma·sina nangoni maidakgipa a·selni gimin ia golmal ong·katna nangaona sokaha,” ine kobor ra·timgiparangna Pyngrope aganangaha.
TMC, BJP ba Congress dol ine biming ra·e sorkari politics kal·angna nangja ine ua mol·moldapataha.
Uni parakatani gitade, police dol mitam manderangko rim·aha aro da·o uamangko uamang sing·sandianiko dakenga.
“Kakketko parakna on·bo aro niam an·tang kamko an·tangan ka·angaigen,” ine Pyngrope aganangaha.
Sakkio pangchake golmal ong·atgipa gimikon rim·aha ine sing·anina CM-ni aganangaha, Video sakkirango pangchake rim·a ong·ode police uamangni kamko ka·aha ine TMC-ni president aganangaha.
“Sakkio pangchake rim·a ong·ode chinga maming saloba jechakja. Da·ode court law iako porikka ra·e nianggen aro uni ja·manode namgipa kragipa raiko ra·chakanggen,” ine ua agandapangaha.
Party-ni dilgiparangko rim·anina ua adita jajanirang dongkuenga, Richard Marak, ua rongtalen agananiko dakangaha jeon ua a·sel ong·gipa biap man·chao ua somoio dongpaja inen talatangahachim, ine Pyngrope aganangaha.
“Uni gimin anga adita aiao inmanaha, jeon uamang sing·sandina uko rim·angaha aro angni chanchiani gitade, niatgenchimode iako logical ong·e angde niatja. Angni ma·siani gitade, uni jikgipa ua apsan salo sana banani ja·man hospital-oniko nokona wataha aro anga ma·siata ua uni jikgipa baksa golmal ong·ani somoio uni nokon ong·engachim,” ine ua aganangaha.
Police department-ko tangchaatpilna nangani bidingo Pyngrope gisiko nangbate mol·molangaha, jeon ian kam ka·dilenggipa officer-na mongsonggipa aro gamchatgipa ong·enga jemangan mikkangchi indakgipa a·sel chagronganiko gelna nanganio nirokangna man·a didiangaha.
“Ian chanchisamsoe dakgipa ong·a ine DGP agana ong·ode indakode maina ua biapo kraao SOP-rangko dongangja,” ine ua agandapangaha.
Tura-o golmal ong·ani a·selko namatangna man·janina sakgni DGP aro West Garo Hills-ni SP-ko dondipatna party-ni dabianio dongkama ong·ode ine sing·anganina, ia neng·nikanina party-ni president ong·e ua maming kattako aganangna man·jawa ine Pyngrope aganchakangaha.
“Party-ni president aro party legislator ong·e anga Tura-o kragijagipa bewalo a·sel ong·gipako jegalataha jemangan ia a·sel ong·ao dosi donga potako man·drakaha. An·ching gita senggipa chasongo dongenggiparang senggijagipa chasongni dake jarikatako an·ching ra·chakangna man·jawa aro dingtangmancha Chief Minister-ko maiba dake be·en bimangko nisiatna jotton ka·angani jekon an·chingni songsalo aro a·dok gimiko ra·chakna man·ja, indakgipa a·selrang skang salrango ong·a dongkuja,” ine a·dokni TMC president aganangaha.