CPA-ni chang 20-gipa tom·bimongani bon·chotgipa salo a·dokni Guv bak ra·a

SHILLONG: Salgnina Shillong songjinmani Rilbong-o donggipa Meghalaya Legislative Assembly-o on·atanggipa Commonwealth Parliamentary Association (CPA) India Region-Zone-III-ni chang 20-gipa Annual Conference ba bilsini tom·bimonganiko Robibar attamo matchotataha aro ia tom·bimonganiko matchotatanio Meghalaya a·dokni Governor Phagu Chauhan, bakko ra·angaha.
CPA-ni tom·bimonganiko matchotatanio a·dokni Governor, jinmana aganprakengon, Commonwealth Parliamentary Association-ara, 1911 bilsio a·bachengatgipa association ong·e Commonwealth-o gitchambatsranggipa dol ong·a ine parakataha.
Ia salgnina ong·atanggipa conference-o mongsonggipa chanchirimani katta bichongara, Natural Disaster ba ong·telaigipa a·selrangko champengna aro salgro salaram a·dokrangkoba a·songni gipin bakrang baksa apsan gadango ong·atna Regional Connectivity-ni bidingo chanchirimanian ong·a ineba Governor parakataha.
Salgro salaram a·dokrangara, chirang banronggipa, a·arang ruronggipa aro banggrianirangchi nangchakegipa biaprang ong·a ine janapatengon, iandake ong·telaigipa a·selrangchi manderangni janggirangna nangchakeaniko ra·baengani a·sel namroro silroroaniko ra·baanioba nangchakeaniko man·skaenga ine Chauhan parakataha.
Salgro salaram a·dokrango rama jal·langrang, rel ramarang, airport-rang, mobile network-rang aro uandakgipa cholrang komiengani a·sel namroro silroroanio namen ja·manchakatako man·enga ineba a·dokni Governor parakataha.
Ia salgnina ong·atanggipa conference-o dingtang dingtang dilgiparangni chanchirimanichi salgro salaram a·dokrango namroro silroroaniko ra·bana man·gen ineba Governor, an·tangni ka·dongchakenganiko parakataha.
Ia CPA-ni tom·bimonganiko matchotatanio dongpae bakko ra·anggipa gipin manderangara, Arunachal Pradesh Legislative Assembly-ni Speaker aro CPA India Region Zone-III-ni Chairman Pasang D Sona, Meghalaya Legislative Assembly-ni Speaker Thomas A Sangma, Meghalaya Legislative Assembly-ni Deputy Speaker Timothy D Shira aro gipinrang ong·a.