SHILLONG: North Eastern Hill University (NEHU)-ni New Education Policy (NEP) 2020 ra·gataniko jegale Meghalaya College Teachers Association (MCTA), Non-Cooperation Movement (NCM)-ko ong·atna parakataha.
Iani bidingo kobor ra·timgiparangna u·iatengon, NEHU-o NEP 2020 ra·gataniko jegalna gita MCTA, August-ni 1 tarik dipet First Semester Class-rangko ra·jana tik ka·angaha indiba 3rd aro 5th Semester-kode class ra·angkuna tik ka·aha ine MCTA-ni secretary Amanda Warjri parakataha.
NEHU-ni Vice Chancellor Prof Prabha Shankar Shukla, gipinrangni nangnikaniko knachakgija NEHU-o NEP 2020-ko ra·gatdrana tik ka·ahani gimin Sonibar salo, MCTA tom·e chanchirimangenba, NCM-ko dakna tik ka·angaha ineba Warjri parakataha.
MCTA secretary-ni parakatani gitade, college-rango aro dingtang dingtang institute-rango Education-ni niamrangko Academic Council-sa rakkitimgipa ong·a ine MCTA bebera·a aro NEHU Vice Chancellor-ni dakdrana jotton ka·aniara Academic Council-kon re·badeani gita ong·engachim.
NEP 2020-ko name nichenggija NEHU-o ra·gatdrana jotton ka·aniara skigiparang aro chatro chatrirangni kosako re·ani gita ong·enga ineba Warjri parakataha.
NEP-ko pilak nangchongmotgipa dolrang aro skigiparang ra·chakkujaskal NEP-ko ra·gatani kamrango bak ra·jachina gita MCTA-ni membor-rangko didiatengon, NEP-ko ra·gatna u·iataniko ra·pilchina MTCA-ni didiatgipani bidingo NEHU-ni Vice Chancellor maming aganchakanirangko on·jahani gimin MCTA-ni secretary suk ong·gijaniko parakataha.
