Gipin a·songrango kam ka·na sikenggipa nurse-rangna sorkari cholko on·gen

SHILLONG: Meghalaya a·dokni bang·bata nurse-rangan kamrangko man·jaengani gimin aro mitamranga bang·gija dormaharangnasa kamrangko ka·tokna nangengani gimin gipin a·songrango kamrangko ka·na sikenggipa nurse-rangna a·dok sorkari, gipin a·songni company-rang baksa agangrikna cholrangko on·gnok.
Iani bidingo a·dokni Health & Family Welfare aro Labour department-rang, re·baenggipa Sukrobar salni 11:30 bajio, Overseas Nursing Job Fair-na dingtangmancha orientation program ba agan-ku·pattie on·ani program-ko Shillong songjinmani State Convention Centre-o ong·atenga.
A·dok sorkari, dingtang dingtang agency-rang, jekai NAVIS HR PVT Ltd, NURSEEDGE aro New Delhi-ni Trained Nurses Association of India (TNAI) dolrang baksa agangrikgen aro ia agency-rang, Germany, Japan, United Kingdom, UAE aro uandakgipa a·songona kamko ka·na gita candidate-rangna cholrangko on·na ramarangko tarie on·skagen. India a·songo training-ko ra·engmiting somoirango ia agency-rangan candidate-rangna dongchakani, kamrang, VISA tariani, jadokna language training ba ku·sik skie on·ani aro uandakgipa kamrangkoba jako ra·gen.
Ia job fair-ko ong·atanio a·dokni Chief Minister Conrad K Sangma, Health Minister Ampareen Lyngdoh aro Labour Minister Shakliar Warjri-ba bakko ra·anggen.
Sorkarini ia kamni gimin kobor ra·timgiparangna talate on·angengon, iana sak 1000-na baten nurse-rang register ka·aha ine a·dokni Health Minister Ampareen Lyngdoh parakataha.
Ia job fair-ko ong·atani miksonganiara, nurse-ni kamrangko poraimangiminrangna aro mongsongbate kamgri ong·e dongna nangenggipa a·dokni nurse-rangna gipin a·songrango kamrangko ka·na cholrangko on·na miksonganian ong·enga ineba Lyngdoh parakataha.
“Online gita register ka·gijagipa nurse-rangba ia job fair-o re·bae bakko ra·ena gita man·gen,” ine Lyngdoh aganaha.
Japan, UK aro UAE gita dakgipa a·songrang, nurse-rangna kamrangko on·na skaniko parakmanaha ine talate on·angengon, Singapora-oniba dolsa company, a·dokni nurse-rang baksa agangrikna gita ia job fair-o bakko ra·ena miksongenga ineba uamang koborko man·soaha ine Health Minister parakataha.
Gipin a·songrango kamko ka·na sikenggipa nurse-rang japrakon gong lak 1-mangni gita dormaharangko man·ani cholrang donga ineba Lyngdoh aganaha.
Gipin a·songrango kamko ka·na sikenggipa nurse-rangna iana, Mumbai, Delhi aro Bangalore gita dakgipa biaprango training-ko ra·na nanggen ineba Health Minister parakataha.