BAGHMARA: Ma·mong aro a·dok sorkarini ra·gatgipa dingtang dingtang scheme-rangko nipilna gita Sombar salo, South Garo Hills a·jani Deputy Commissioner S Awasthi-ni dilanichi District Coordination Committee-ni tom·aniko Baghmara NIC-ni District Resource Centre-o ong·atangaha.
Ia tom·anio ma·mong aro a·dok sorkarirangni ra·gatgipa scheme aro project-rangko nipilangengon, 2023 April jaoni da·alona kingking dingtang dingtang department-ni jako ra·enggipa scheme-ni physical aro financial progress report-rangko Deputy Commissioner ra·angjolaha.
Gital project-rangni bidingo aro dingtang dingtang department-ni gisepo agangrike kamrangko ka·rimanio chagrongna nangenggipa neng·nikanirangko namatna gitaba ia tom·anio officer-rang chanchirimangaha.
Dingtang dingtang department-ni officer-rang ia tom·anio, an·tangtangni ka·enggipa scheme-rangni chu·sokanirangko aro nisanrangni giminba Deputy Commissioner-na talate on·angtokaha.
