TURA: Indian Constitution-ni Sixth Schedule ning·o on·gimin niamrangko a·dok sorkarirang pe·ahani a·selsa Meghalaya a·doko Autonomous District Council (ADC)-rangna bate a·dok bilakbatenga ine Sombar salo, Tura-ni BJP MDC Bernard N Marak matnangataha.
“Sixth Schedule-ni ning·o on·gimin niamrangko, joltangni ku·sik aro daka rikanirangko name ma·sichengesa DC aro SP-rangko Hill district-rango songna gita Joint Monitoring Committee-ni tom·anio songgigrikahachim. Indake ong·genchimoba, Meghalaya a·dokni a·jarango songako man·enggipa bang·bata officer-rangan ia biaprango songdongenggipa manderangni daka rikani, janggi tangani bewal aro niamrangni gimin ma·sigiparang ong·ja. Mitam officer-rangde ia biaprango songdongenggipa Tribal-rangni daka rikani, janggi tangani bewal aro niamrangkon ma·sijani a·sel bang·bata changon uamang Tribal-rangni janggi tangani bewalrangko ma·sisrettoka,” ine Marak parakataha.
A·dokni a·brirango songdongenggipa manderangkon a·songni niam bidikan chel·chakgipa gita ong·achim ine janapatengon, ia biaprango kamko ka·na songako man·enggipa officer-rangna Tribal-rangni itihasko skie on·an baksana maini gimin sorkari aro sorkari officer-rang ADC-rangna kajinarangko gamna nanga, uarangni giminba skie on·na nanga ine Marak parakataha.
“A·dok sorkari bilko mesokna man·naba gnang indiba ia a·brini biaprango chu·gimik bilde a·brini manderango aro ADC-rangosa ong·a. Ia a·brini biaprango manderangsa nokgipa ong·a aro a·dok sorkaride nokgipa ong·ja aro ian a·brini niamrang ong·a. Sixth Schedule a·jarango a·dok sorkaride bilko man·jachim indiba political dilgiparang, ADC-rangoba napbae bilrangko ra·sekahani a·selsa da·alo Tribalrangni pal a·dok sorkarisa bilrangko jakkalskaengaha,” ine Marak parakataha.
2014 bilsio ANVC dolrang baksa sorkarini songgigrikanio soi ka·grikgipani gimin janapatengon, ia songgigrikanio soi ka·grikanichi ma·mongo BJP sorkari, da·o ADC-rangko bilakbatatna ja·kurangko de·aha ine Tura MDC parakataha.
