TURA: Meghalaya Public Service Commission-ni corrigendum notice-o Garorangna Meghalaya Secretariat-o kange dongipa ge 43 Lower Division Assistant (LDA)-ni kamrangko ge 39-ona komiataha ine GHADC-ni Rongrong MDC Rinaldo K Sangma, suk ong·gijaniko parakatenba, Garorangni namgnina iani bidingo ta·raken ja·kuko de·china a·dokni Chief Minister Conrad K Sangma-ko didiataha.
Sangma-ni parakatani gitade, Meghalaya High Court-ni ge·etaniko on·ani ja·man 2022 bilsini September 14 tariko MPSC-ni taridapgipa corrigendum-o Garorangna Meghalaya Secretariat-o ge 43 LDA-ni kamrangko kange donahachim indiba ja·mano ia 2023 bilsini July 28 tariko corrigendum-ko u·iattaianiode Garorangna chamgimin kamrangko ge 39-ona komiatskaahachim.
Garorangna chamgimin kamrangko komiatahani gimin an·tangni suk ong·gijaniko parakatengon, “MPSC-ni iandake corrigendum notice-rangko on·aniara Reservation Roster-ni bidingo Meghalaya High Court-ni ge·etaniko ja·rikjaenga ine mesokani ong·a,” ine Rongrong MDC parakataha.
Iandake MPSC-ni u·iatanirangko dingtangatahani gimin an·tangni suk ong·gijaniko parakatengon, “Ian chingni man·na nangenggipa bak rengsiko ra·e katani gita ong·enga aro High Court-ni ge·etaniko manija gita ong·enga,” ine Sangma matnangatenba, iani bidingo ta·raken taridapna nanganirangko taridapchina gita a·dokni Chief Minister-ko didiataha.
Garorangna dongimin kamko komiata ine Rongrong MDC suk ong·gijaniko paraka
Date:
Share post:
