TURA: Re·anggipa July-ni 24 tariko, Tura-ni Mini Secretariat-o rang·gitik so·sojengjeng ong·anio a·dokni Chief Minister-ko chadrapna gita darangoba maming chanchisamsoe dakanirang dongjachim ine West Garo Hills DC Jagdish Chelani-ni parakatani ja·man, ia so·sojengjeng ong·anina TMC-ni dilgipa Richard Marak aro gipinrangkoba rim·ahani gimin Dadenggre-ni TMC MLA Rupa Marak sing·doatskaaha.
Tura-ko Winter Capital songchina aro Reservation Roster-ko backlog policy-o ra·gatchina dabienggipani bidingo a·dokni Chief Minister Conrad K Sangma, ACHIK, GSMC aro dingtang dingtang dolni dilgiparangko Mini Secretariat-o gronge agangrikengmiting somoio rang·gitik ka·a ding·chaoenggipa manderang ro·ongrangko goahani a·sel adita sak police-rang saknaanirangko man·na nangahachim aro gari gorarangba bang·en nosto ka·ako man·tokahachim.
Ia a·sel ong·ani ja·man, so·sojengjeng ong·atgipa manderangni gisepo, a·dokni Chief Minister-kosa chadrapna miksonganirang dongachim aro ian chanchisamsoe dakanisa ong·a ine a·dokni Director General of Police (DGP) parakatahachim.
Indake ong·genchimoba, ia a·sel ong·anio Chief Minister-ko chadrapna chanchisamsoe dakanide dongjachim indiba a·sel ong·gakanisa ong·aha ine DC-ni talataniko on·angani ja·man, ia a·selsa bang·a manderangko potchipe rim·ahani gimin Dadenggre-ni MLA sing·doatskaaha.
“Ia a·sel ong·aniara namen ong·nanggija ong·aha aro jegalna kragipa ong·aha indiba ia a·sel ong·anio Chief Minister-ko so·otna maming chanchisamsoe dakani dongjachim ine DC an·tangan talatahani gimin ian DGP aro Police department-ni a·kanganiko jegalani gita ong·aha. Maini gimin da·o iandakgipa kattarang ong·katengaha? Ia a·sel ong·anio chanchisamsoe dakani dongjagenchimode maini gimin a·bachengo police-rang iako a·kangaha? Ia a·sel ong·na salsa skangan tangka aro churangko sualsoaha ine police-rang a·kangachim aro Richard Marak-koba so·sojengjeng ong·atdilgipa ine mingahachim indide da·o maikai uamang iano dos donggiparang ong·aha?” ine Marak sing·doataha.
Ia so·sojengjeng ong·anio darangba chanchisamsoe dakani dongja ine nika ong·ode maini gimin Richard Marak-ko aro gipinrangkoba rim·aha ineba Marak sing·doataha.
