SHILLONG: Ma·mong sorkarini chamatgipa tangka paisarangko jakkalsretani gimin Garo Hills Autonomous District Council (GHADC)-ni gitcham Executive Committee (EC)-ni membor saksku, contractor sakgni aro GHADC-ni gitcham principal secretary-ni kosako Meghalaya Lokayukta-ni kachari charge sheet ka·aha.
Lokayukta-ni ning·o donggipa Inquiry Wing-ni Investigation Officer/Member Anil Sangma-ni investigation report-o pangchake ia manderangni kosako Lokayukta, charge sheet-ko ka·aha.
Tura-o gong 6,01,31,100 ong·gipa Member Hostel-ko rikani project-ko matchotjahani gimin Mahendraganj constituency-ni da·o ong·enggipa MLA Sanjay A Sangma aro gipinrangni kosako saksa Kingstone Bolwari Sangma minggipa mande, Lokayukta-na badi ka·doangahachim ine nikna man·a.
Ia tangkarangara, Schedule Tribe a·jarango namroro silroroaniko ra·bana gita 2015-16 bilsirango Central Plan Scheme-ni Special Assistance-ni ning·o ma·mong sorkarini chamatgipa gong kror 100.71-ni bak ong·achim.
Iani bidingo badi ka·anina preliminary inquiry-ko dakon, ia project-rangko chu·sokatanio tangka paisarangko jakkalsretaha ine nikenba iani bidingo ning·tubate sandirokchina Lokayukta ge·etaniko on·angahachim.
Ning·tubate sandirokchina ge·etaniko man·ani ja·man, Lokayukta Inquiry Wing-ni Member Anil Sangma, sandirokaniko dakenba Lokayukta-na chu·gimik report-ko on·ataha aro uni investigation report-o pangchake GHADC-ni gitcham MDC-rang, contractor-rang aro GHADC-ni gitcham official-ni kosako Lokayukta, charge sheet-ko ka·aha.
Lokayukta-ni charge sheet ka·ako man·gipa manderangara, GHADC-ni gitcham chief executive membor (CEM) Denang T Sangma, gitcham MDC Augustine R Marak, gitcham MDC Brilliant R Marak, gitcham MDC Dipul R Marak, gitcham MDC Kurosh M Marak, gitcham MDC Winnison Ch Marak, gitcham MDC Dolly K Sangma, gitcham MDC Bhupendra Hajong, gitcham MDC Sukaram K Sangma, contractor Sanjay A Sangma, contractor Dolrich D Sangma aro GHADC-ni gitcham secretary Hewingson A Sangma ong·a.