SHILLONG: National Education Policy (NEP) 2020-ko ra·gatanio dingtang dingtang college-rangni chagrongna nangenggipa kamrangni gimin North Eastern Hill University (NEHU)-ni Vice Chancellor Prof Prabha Shankar Shukla, college-o skigiparang, principal-rang aro dingtang dingtang dolrang baksa agan-chanchirimna gita ku·rachakaha ine North Eastern Hill University Students Union (NEHUSU)-ni finance secretary Mandor Diengdoh Swer parakataha.
NEHUSU finance secretary-ni parakatani gitade, NEP 2020-ara ia bilside Meghalaya a·doko hybrid mode-osa ong·kuaigen aro ia bilsio ra·gata ra·gatgijanide college-rangni skaniosa ong·aigen ine NEHU-ni VC talataniko on·aha.
Indake ong·genchimoba ia gital NEP-ko ra·gatanio ja·manchakgenchimode, ja·mano minggni course-rang dongskagnok aro gital NEP course-rangko ra·giparangnasan mikkang niani dongahaode kamrangko sandianio gitcham system-ko ja·rikgipa chatro chatrirangna neng·nikanirang ong·skagnok ine Swer parakataha.
Syllabus-ko Academic council-ba ra·chakahachim indiba ia gital syllabus-o prospectus-ni dingtangani aro mai subject-rangko ra·na man·gen, uani giminsa college-rangna u·iataniko on·atkuja ineba NEHUSU-ni finance secretary parakataha.
Swer-ni talataniko on·angani gitade, academic council-ni ra·chakgipa subject-rangara principal-rangna refer ka·atgipa subject-rangoni namen dingtanggrika aro academic council-ni ra·chakgijagipa subject-rangba dongachim.
“Iandake an·ching niatgenchimode NEP-ko ra·gatanio NEHU-ni Vice Chancellor, college-rangko draani gita ong·enga. Chinga NEP-kode jegalenga ong·ja indiba kamrangko sikkele ka·na nangjachim,” ine NEHU-ni finance secretary aganaha.
NEHU-o ia gital NEP 2020-ko ra·gatdraengani gimin suk ong·gijaniko mesokna gita college-rango skigiparang, first semester-ni class-rangkode ra·gija jingjengatengachim ine nikna man·a.
