SHILLONG: Adita salrangna skang, Tura-o so·sojengjeng ong·anina manderangko rim·anio police-rangsa sakkirango pangchake rim·enga aro iano maming dakeba sorkari jak dongja ine Budbar salo, a·dokni Chief Minister Conrad K Sangma talataniko on·angaha.
Chief Minister-ni kobor ra·timgiparangna parakatani gitade, ia a·sel ong·anina police-rangsa sakkirango pangchake dos donggipa manderangko rim·enga aro iano sorkaride maming bak dongjachim.
“Ia a·sel ong·anio manderangko rim·anio sorkaride maming ge·etanirangko on·ani dongja indiba police-rangsa sakkirangko nie manderangko rim·enga,” ine Sangma aganaha.
So·sojengjeng ong·anio maming chanchisamsoe ja·ku de·anirang dongja ine West Garo Hills Deputy Commissioner (DC)-ni aganenba ja·mano an·tangni aganako taridapgipani bidingo sing·skaon, DC-ni aganako chu·gimik ra·jaha ine ua an·tangan talate on·ahachim ine Chief Minister parakatskaaha.
“Je ja·kurangko de·enga, ia pilakan kakketo pangchakgipasa ong·a,” ine ua aganaha.
Ia a·selni bidingo jakgitele sandirokaniko dakchina dabienggipani gimin sing·on, da·o ia a·selni bidingo magisterial inquiry-ko dakengaha aro ja·mano nanggenchimode jakgitele sandirokanikoba dakatna man·gen ine Sangma parakataha.
July-ni 24 tariko Tura-ni CMO-ko manderangni jinma chadrapgipani bidingo magisterial inquiry dakani report-na sorkari sengengkua ine janapatengon, magisterial inquiry-ni report-ko on·na bang·e somoirangko nangjawa ine Chief Minister parakataha.
Tura-ni CMO-o dingtang dingtang dolrang baksa Chief Minister-ni tom·e agangrikengmiting somoio manderangni rang·san chadrapanichi sak 18-na baten police-rang saknaanirangko man·na nangahani gimin da·o dipet police-rang sak 40-na baten manderangko rim·ahachim.
Dos donggipa manderangko police-rang rim·jagenchimoba police-rang kamtangko name ka·jaenga ine manderang matnangskagenchim ineba Chief Minister, police-rangna chake aganaha.