SHILLONG: Meghalaya a·doko lekka porako namdapatna gita miksonganio a·dok sorkari, State Education Commission-ko songaha aro ia commission-ni office-ko Bristibar salo, a·dokni Chief Minister Conrad K Sangma, Shillong-o donggipa MBOSE building-o oprake on·angaha.
State Education Commission-ko dilna gita a·dok sorkari, North Eastern Hill University (NEHU)-ni ning·o donggipa Education department-ni Prof SM Sungoh-ko Chairperson songaha aro Adviser-na UPSC-ni gitcham Chairman Prof David Reid Syiemlieh baksana gitcham IFS officer aro MBOSE-ni gitcham Executive Chairman Tony TC Marak-ko songenba, Education department-ni Secretary in-charge Ambrose Ch Marak-ko Member Secretary songahachim.
Ia State Education Commission-na sak 12 co-opted membor-rangkoba sorkari songe on·angahachim.
Ia State Education Commission-ni office-ko kulie on·angani ja·man a·dokni Chief Minister Conrad K Sangma, jinmana aganprakatengon, State Education Commission-ko songanichi a·doko lekka porani kamrangko namdapatna man·gnok ine an·tangni ka·dongchakenganiko parakataha.
“Lekka porani kamrango dingtang dingtang neng·nikanirang donga aro iako Education Commission-ni nirokanichi namatna man·gen,” ine Sangma aganaha.
Ia State Education Commission-ni office-ko kuliani ja·man commission-ni skanggipa tom·aniko ong·atna man·ahani giminba Chief Minister, an·tangni kusi ong·aniko parakataha.
