TURA: Adita salrangna skang, West Garo Hills a·jani Phulbari police station-ni ning·o donggipa Jangrapara songo bilsi 12 ong·gipa me·chik bi·sako ka·saninggija dake so·ote galani gimin FKJGP Chibinang unit, raken jegalataha aro sianggipa bi·sani nokdangna kakket bichalko on·china dabiangaha.
Re·anggipa August-ni 1 tariko, bilsi 12 ong·gipa me·chik bi·sako uni nokoniko rim·angenba, uni gitokko rageke so·otahachim.
Ia a·selni bidingo police-rang, ning·tue sandirokanirangko dakengon, ia me·chik bi·sako so·ote galna skang drae til·ekakon ine jolo songdongenggipa manderang parakataha.
Koborko on·ani gitade, ia a·selni post mortem report-na police-rang sengkuengachim.
“Ian namen ka·saninggija kamko mesokani ong·aha aro ia bi·sako so·ote galani gimin chinga uni nokdangna kakket bichalko dabienga. Ia me·chik bi·sako so·otgipa mande da·oba kate dongkuenga aro uko ta·raken rim·na nanga,” ine FKJGP Chibinang unit-ni president Binoth Sangma parakataha.
Dos dakgipa mandeko da·onan rim·kujaengani gimin suk ong·gijaniko parakatengon, “Ia me·chik bi·sako so·otanina potchipenggipa mande da·onan katchipe dongenga aro chingni ma·siani gitade ua a·sel ong·gipa biap sambarangon dongnuenga. Police-rang dos dakgipa mandeko rim·galgale kakket bichalko ra·bana nanga,” ine Sangma parakataha.
Sianggipa me·chik bi·sani nokdangnaba FKJGP, kalimpaaniko parakataha.
