SHILLONG: Manipur a·doko so·sojengjeng ong·enganichi bang·en manderang so·otanirangko man·na nangengahani gimin aro bang·a nokdangrangan nokgri jamgri ong·na nangtokengahani gimin tom·tomaniko ra·bapilna man·na gita ta·raken ja·kuko de·china Shillong-ni Catholic Association, a·songni President Droupadi Murmu-na chitti seatna tik ka·angaha.
Catholic Association-ni membor JA Lyngdoh-ni kobor ra·timgiparangna parakatani gitade, uamang a·songni President-na a·dokni Governor-ni jako memorandum-ko on·atgen.
Manipur a·doko ong·enggipa obostarangko namatna gita Manipur sorkari aro ma·mong sorkari maming ja·kurangko de·jaenga ine suk ong·gijaniko parakatengon, iani bidingo a·gilsak gimikchin suk ong·tokjaengaha aro iani giminsa uamang, tom·tomaniko ra·bapilchina gita a·songni President-na seatna tik ka·aha ine Lyngdoh parakataha.
“Iani bidingo a·songni President-ko mol·molgenchimode ua, ma·mong sorkari baksa agangrike nanga gita ja·kurangko de·anggen ine chinga ka·dongenga,” ine Shillong Catholic Association-ni dilgipa aganaha.
Manipur a·doko ong·enggipa obostani bidingo Catholic Association-ni skanggipa ja·ku de·aniara, a·doko donggipa pilak diocese-rangkon Manipur a·dokna bi·chakchina ge·etanian ong·aha ine talataniko on·angengon, Manipur a·dokoni katbae Shillong songjinmao ma·chakenggipa manderangnaba uamang cha·anirang aro gipin nanga bosturangko on·e dakchakenga ine Lyngdoh parakataha.
Manipur a·doko tom·tomani sokbapilchina aro pilak manderangkon meli nangrimao janggi tangchina didie Catholic Association, August-ni 5 tarik Sonibar salo, jinma tom·e re·jomaniko ong·atenga ineba ua parakataha.
Ia jinma re·jomaniko pring 10:00 baji dipet, Madan Iewrynghep-oni a·bachengate Don Bosco Mini Stadium-o matchotatgen ine u·iatengon, ia re·jomanio bakko ra·echina gita Shillong Catholic Association, pilakkon mol·molataha.
