TURA: Meghalaya Lokayukta-ni charge sheet ka·gipani kosako GHADC-ni gitcham secretary Hewingson A Sangma-ni Special Leave Petition (SLP) ka·aniko Supreme Court jegalataha aro uandaken da·o charge sheet ka·a man·gipa manderangni kosako Tura-ni Special Court, bichal ka·na gita man·gnok.
Tangka paisarangko jakkalsretanina Garo Hills Autonomous District Council (GHADC)-ni gitcham MDC-rang aro officer-rangko Lokayukta-ni dosi chananiko jegale iana skangba, GHADC-ni gitcham secretary, Meghalaya High Court-o ijahar ka·ahachim indiba uni ijahar ka·aniko High Court jegalatahachim.
High Court-ni jegalatani ja·man ua Supreme Court-ona re·ange Special Leave Petition-ko ka·skaahachim indiba ukoba Supreme Court jegalatahani gimin da·o dosi chana man·gipa manderangko Tura-ni Special Court, bichal ka·anggnok.
Garo Hills-o namroro silroroaniko ra·bana gita ma·mong sorkarini chamatgipa krorni kror tangka paisarangko jakkalsretani gimin saksa Nilberth Ch Marak minggipa mandeni Lokayukta Court-o badi ka·doangani ja·man, sandirokaniko dakon, GHADC-ni gitcham MDC-rang, officer-rang aro adita sak contractor-rang dos donga ine Lokayukta nikna man·ahachim aro ia manderangni kosako ja·kurangko de·na gita Tura Sessions Court-na pakwate on·angahachim.
Tangka paisarangko jakkalsretanina Lokayukta-ni charge sheet ka·anio biming mingako man·gipa manderangara, GHADC-ni gitcham chief executive membor (CEM) Boston Marak, gitcham MDC-rang, chong·motan Mark Goera Marak, Rightious Sangma, Jimbirth Sangma, Levastone Sangma, Winnison Ch Marak, Rupert Sangma, Kenedik S Marak, Dhormonath Sangma, Ismail Marak, GHADC-ni gitcham secretary Hewingson Sangma aro contractor sakgni, Nikseng Sangma aro Kubon Sangma ong·achim.
Iani ja·manba, Tura-o gong 6,01,31,100 ong·gipa Member Hostel-ko rikani project-ko matchotjahani gimin Kingstone Bolwari Sangma minggipa mandeni badi ka·ani ja·man, da·o Mahendraganj-ni MLA ong·enggipa Sanjay A Sangma baksana GHADC-ni gitcham Executive Committee-ni adita sak dilgiparangni kosako Lokayukta charge sheet ka·angtaiahachim.
Ia chang, Lokayukta-ni charge sheet ka·ako man·gipa manderangara, Mahendraganj-ni MLA Sanjay A Sangma baksana GHADC-ni gitcham chief executive membor (CEM) Denang T Sangma, gitcham MDC Augustine R Marak, gitcham MDC Brilliant R Marak, gitcham MDC Dipul R Marak, gitcham MDC Kurosh M Marak, gitcham MDC Winnison Ch Marak, gitcham MDC Dolly K Sangma, gitcham MDC Bhupendra Hajong, gitcham MDC Sukaram K Sangma, contractor Dolrich D Sangma aro GHADC-ni gitcham secretary Hewingson A Sangma ong·achim.
Ia manderangni jakkalsretgipa tangkarangara, Schedule Tribe a·jarango namroro silroroaniko ra·bana gita 2015-16 bilsio Central Plan Scheme-ni Special Assistance-ni ning·o ma·mong sorkarini chamatgipa gong kror 100.71-ni bak ong·achim.