SHILLONG: National Education Policy (NEP) 2020-ko hybrid mode ba dingtang dingtang dake ong·gija pilaknan apsan ra·gatchina NEHU-ni Vice Chancellor Prabha Shankar Shukla-ko aganmanaha ine Robibar salo KSU parakataha.
“NEP 2020-ko VC-ni agana gita hybrid mode-o ra·gataniko chinga maming dakeba ra·chakna man·jawa,” ine KSU-ni assistant education secretary Riches Malngiang, kobor ra·timgiparangna parakataha.
NEP-ni bidingo an·tangtangni chanchianiko aro nangnikaniko talate on·na gita adita salrangna skangsan uamang NEHU-ni VC-ko grongeaha ine janapatengon, da·o dipet NEP-ni bidingo a·dokni college-rang meligrikna man·kujaengani gimin ian namen man·dikmiting somoi ong·enga ine Malngiang parakataha.
KSU-ni parakatani gitade, mitam college-rang ia bilsionin NEP-ko ra·gatna kusi ong·engon, mitam college-rangde da·o dipet NEP-ko ra·gatna gita tariskakujaengachim.
Gital aro gitcham system-ko apsan somoio ra·gatna nanggenchimode bang·en jajaanirang ong·katgen ineba Malngiang aganaha.
Gitcham system-ko ja·rikenggipa college-rangde gnigipa semester-o NEP-ko a·bachengna man·skakujawa ineba KSU-ni assistant education secretary parakataha.
“Uni ortode gital system-ko ra·gatjagenchimode gitcham system-ko ja·rikenggipa college-rango undergraduate course-ni chatro chatrirang graduate ong·kujaskal, apsan gitcham system-kon ja·rikna nangaignok,” ine Malngiang, jean KSU NEHU unit-ni president-ba ong·engachim, kobor ra·timgiparangna aganaha.
Gital NEP-ko ra·gatanichi chatro chatrirang bang·en namgnirangko man·gen ine KSU-ba ma·sienga ine janapatengon, NEP-ko ra·gataniara academic council-ni nangnikani gitasa ong·na nanggen ine Meghalaya College Teachers Association (MCTA)-ba dabiengani gimin da·o adita jajaanirang dongkuenga ine Malngiang parakataha.
Academic council-ni tom·anio NEP-ni bidingo mamingkoba tik ka·jaha ineba ua parakataha.
NEHU-ni VC baksa tom·anio college-ni principal-rangba mamingkon janapjahani gimin uamangni a·selba ong·engaha ineba KSU-ni assistant education secretary parakataha.
“VC baksa tom·anio principal-rang bang·batan, NEP-ko ra·gatna tarikuja ine VC-nade agantokjaha,” ine ua aganaha.