SHILLONG: HM Shangpliang-ni NPP-o napna miksongenga ine koborrangko on·gipani bidingo BJP-ni dilgiparang, disciplinary committee-na pakwate on·angaha ine Sombar salo, BJP-ni state president Ernest Mawrie parakataha.
NPP-o napna miksongenga ine koborko man·engani gimin Shangpliang-ni kosako BJP-ni gita maiba ja·kurangko de·engama ine sing·anina Mawrie, ia kattarangko parakataha.
“BJP-ni spokesperson, NPP-o napna miksongenga ine songbadrango seanirangko niksoani ja·man disciplinary committee-ni tom·anio chanchirimaha aro da·o uni kosako disciplinary committee-sa nanga gita ja·kurangko de·anggnok. Disciplinary committee-ni ku·pattianiko man·chenggijade chinga darangnaba show cause notice-ko on·na man·ja,” ine Mawrie, kobor ra·timgiparangna parakataha.
Da·o dipet iani bidingo Shangpliang an·tangde BJP-na maming u·iatanirang dongkuja ine talataniko on·angengon, songbadrango seanirangkoba ua jegala dongkuja aro NPP-o napna miksonganirangkoba paraka dongkuja ine BJP-ni state president parakataha.
Mawrie-ni parakatani gitade, re·baenggipa 2024 bilsini Lok Sabha election-o ua (Shangpliang) Shillong Parliamentary constituency-oni susaana miksonganirang dongani gimin uni NPP-o napna miksonganiko songbadrango seanirangara kakket ong·bebeani cholrang donga.
Indake ong·genchimoba BJP state president-ni parakatani gitade, da·o dipet Shangpliang, Education department-ni adviser-ba ong·engani gimin Education department-ni kamrango jakchakjae BJP-ni adita program-rango bakko ra·ena man·jawa ine Shangpliang, una u·iatahachim.
Indake ong·engon, re·baenggipa 2024 bilsini Lok Sabha election-o BJP-ni dilgiparang, Shillong aro Tura Parliament seat damgnion candidate-rangko susaatna nangnikenga ineba Mawrie parakataha.
