AMPATI: Sombar salo, South West Garo Hills a·jani chang 11-gipa Foundation Day-ko Ampati-ni Multi Facility Centre-o maniangaha aro ia salko manianio, South West Garo Hills a·jani Deputy Commissioner RP Marak aro dingtang dingtang officer-rangba bakko ra·angtokaha.
South West Garo Hills a·jani bilsi 11 gapaniko manianio, skulrango poraienggipa chatro chatrirang, skigiparang, budepa butchumarang aro songni nokni NokmaSanerangba bakko ra·angtokaha.
Ia salko manianio, South West Garo Hills a·jao songdongenggipa dingtang dingtang jatrangni chrok mesaanirang, git ring·anirang aro dakmesokanirangko nikna man·angan baksana jinma bolrangkoba ge·angtokaha.
South West Garo Hills a·jani bilsi 11 gapaniko manianio, songni nokni manderangna nambee dangdike on·ahani gimin Mahendraganj CHC-ni Senior Medical & Health Officer Dr Noor Ain Khan aro District Social Welfare Officer In-charge Torali K Marak-na mande ra·pilskaanikoba dakangaha.
Ia tom·aniko ong·atanio South West Garo Hills a·jani Deputy Commissioner RP Marak, jinmana aganprakangengon, South West Garo Hills a·jani bilsi 11-ko ga·tapahani gimin a·jani manderangna namgipa skaniko on·angenba, mikkangchiba a·dokni namroro silroroanina an·tangtangko gital dake on·kangchina aro manderangna dangdike on·angkuchina sorkari department-rango kam ka·enggiparangko didiangaha.
Ia tom·anio South West Garo Hills a·jani SP V Kumar-ba jinmana aganprakengon, bilsi 11-na re·mikkanganio dingtang dingtang neng·nikanirangko chagrongna nangahaoba a·jao namroro silroroaniko nikna man·engaha ine an·tangni kusi ong·aniko parakangaha.
