TURA: Meghalaya a·doko bijoli chu·ongjaengani gimin solar energy ba salni bilko bijolina jakkalskana man·gen ine Budbar salo North Garo Hills District Youth Congress (DYC)-ni president aro Mendipathar-ni gitcham Congress candidate Timjim K Momin parakataha.
“Meghalaya a·doko million 1700 unit bijoliko bilsiprako nangengon, bilsio 1000 ba 1100 unit-ni bijolikosan ong·katatna man·engani gimin 600 ba 700 MW-mangni gitade bijoli chu·ongjaenga aro mikkangchide bijoli chu·onggijani batroroangkunaba gnang. Ia sal somoirango bijolini ostrorang aro mobile phone-rangko jakkalengani a·selba bijoli cha·aniko bariatenga aro ian mikkangchina namen kenchakna nangani ong·enga,” ine Momin parakataha.
Meghalaya a·doko nanga gitan salni bilko man·engani gimin iandake bijoli chu·onggijaniko namatna gita salni bilrangko jakkalskana man·gen ineba NGH DYC-ni president parakataha.
A·doko rooftop solar project-na a·dok sorkari, New & Renewable Energy Ministry-ni ning·o ma·mong sorkarini ra·gatgipa scheme-ko jako ra·ahaoba bang·a manderangan iani bidingo ma·sitokkujaenga aro iani namgnirangko ra·tokjaenga ineba Momin parakataha.
A·doko Net Energy Metering (NEM) billing system-ko a·bachengatchina gitaba Youth Congress-ni dilgipa a·dok sorkarina ku·pattianiko on·angaha.
“Meghalaya a·doko da·o mikkang bilsisnimangoni bilsi 10-mangona bijoli chu·onggijaniko chel·chakna gita a·dok sorkari, 2025 bilsini gisepo komibeoba 200 MW aro 2030 bilsini gisepo 800-oni 1000 MW-ona salni bilko man·na nanggen aro iako chu·sokatna gita sorkari, manderangna salni bilko jakkalni bidingo ma·siate on·na nangchongmotenga,” ine Momin parakataha.
A·doko bijoli chu·ongjaengani gimin salni bilko jakkalskana man·gen: DYC prez
Date:
Share post:
