Job Reservation-rangosan pangchakaijachina Tribal-rangko Conrad didia

SHILLONG: India a·songni salgro salaram jolrango songdongenggipa bang·bata Tribal manderangan sorkarini job reservation-rangosa pangchakbatengani a·sel tang·dona gita man·jaenga ine Budbar salo, a·dokni Chief Minister Conrad K Sangma, an·tangni suk ong·gijaniko parakatenba, job reservation-rangosan pangchakaigija a·gilsakni gipin biaprango donggipa manderang baksa susapana man·na gita an·tangtangan tikkelgiparang ong·china Tribal manderangko didiangaha.
Budbar salo, North East Indigenous People’s Forum (NEIPF) Meghalaya Chapter-ni gita World Indigenous Day-ko Shillong NEHU-ni Multi Conventional Hall-o manidilanio dongpae bak ra·engmiting somoio Chief Minister, ia kattarangko aganaha.
Salgro salaram a·dokrango songdongenggipa Tribal-rangni neng·nikanirangna ua an·tangba suk ong·ja ine janapatengon, Tribal jatrangni identity aro ong·baani ja·dilko ripinge rakkianian dingtang dingtang Tribal political dol aro gipin dolrangni nangnikaniba ong·a ine Chief Minister parakataha.
Job reservation-rangosan pangchake dongaijachina Tribal manderangko didiangengon, manderang aro mongsongbate Tribal-rang an·tangtangni chanchiani bewalko dingtangatna nangchongmotenga ine Sangma aganaha.
“An·ching reservation-rangosan pangchakaigija una baten cholrangko sandina nanga aro a·gilsakni gipin manderang baksa susapana man·na gita salgro salaramni chadamberangba chanchiani bewalko dingtangatna nanga,” ine ua aganaha.
Salgro salaram a·dokrango songdongenggipa dingtang dingtang Tribal jatrangni gimin see rakkina gita jotton ka·china NEIPF-ko didiangengon, “Meghalaya a·doko songdongenggipa dingtang dingtang Tribal manderangni daka rikanirangko see rakkina gita Meghalaya sorkariba, a·dokni damgittam autonomous district council (ADC)-rang baksa kamko ka·enga,” ine Chief Minister parakataha.
Salgro salaramni dingtang dingtang a·dokrango dingtang dingtang Tribal jatrang songdong a·chaengani giminsa neng·nikanirangko chagrongna nangenga ine janapatengon, iandakgipa program-rangko ong·atanichi salgro salaram a·dokrang apsan ku·cholsan ong·e tang·dona man·gen ine Sangma parakataha.
“Manipur a·doko ong·enggipa obostarangko nike anga namen ka·a be·a aro Manipur a·doko ong·enggipa obostarangko namatna gita NEIPF gita dakgipa dolrangan kamko ka·gen ine anga ka·dongenga,” ine ua aganaha.
Iana skang, a·dokni Chief Minister Conrad Sangma, ‘Indigenous 2023’ ingipa ki·tapkoba oprake on·angaha.
Ia program-ko ong·atanio salgro salaram jolo donggipa dingtang dingtang a·dokrangoni delegate-rangba bakko ra·angaha.