TURA: Budbar salo, South Garo Hills a·jani Nilwagre minggipa songo, Border Security Force (BSF)-ni head constable Vijay Kumar minggipa mandeko, mongma doke so·otaha ine kobor on·aha.
Koborko on·ani gitade, ia a·sel ong·ani Budbar salni 12:30 bajimango ong·aha aro ua somoio BSF-ni sipai sakgni, Domdoma border outpost (BOP)-oni Nilwagre BOP-ona motorcycle-o re·angengachim.
Uamang, Rasnagre aro Nilwagre songni gisepo donggipa ramaona sokon, uamangko dolsa mongmarang chadrapsoaha. Mongmani chadrapako man·e sipai sakgnioni saksade bilongbee mata bu·anirangko man·aha aro ja·mano uko songni manderang, Sibbari PHC-ona ra·angahachim indiba Sibbari health centre-ona sokangon uko siaha ine doctor-rang parakataha.
Batanggimin salrangonin South Garo Hills a·jani border ramarango mongmarang re·rame, rama gita re·pakangenggipa manderangko chadraprongengachim ine nikna man·a.
