TURA: North Garo Hills a·jani Rongopgre songo Jal Jeevan Mission (JJM)-ni kamrangko dontongatani a·sel songni manderang chirangko man·jaenga aro Swachh Bharat Mission (SBM)-ni ning·o on·enggipa toilet-rangko man·jae neng·nikanirangko man·tokna nangenga ine parakataha.
Ia Rongopgre songara, National Highway 51 ramao donggipa song ong·e, Tura-oni km 55 aro Assam a·doko donggipa Krishnai-oni km 45-mangni gitasa chel·grikaiachim aro ia songo komibeoba te 153 nokrang dongachim.
Koborko on·ani gitade, ia songni JJM project-ko North Garo Hills a·jani saksa Mark Jery Marak minggipa mandena on·ahachim.
“Chingna SBM-ni toilet-rangko on·na miksongenga ine chingni ID-rangko aro gipin lekkarangko baditaba chang chingniko bi·a dongahachim indiba da·alonan chingna toilet-rangko rike on·a dongkuja. Ia scheme-ko chinga man·na nanga ong·ode sorkari aro gipin manderang chingna on·na nangachim,” ine Rongopgre Dosbari songni president Malesh K Marak parakataha.
JJM scheme-ko man·kujaengani gimin janapatskaengon, “Batanggimin bilsignionin JJM-ni ning·o on·enggipa water supply scheme ia songo bon·chongdike dongengaha aro darangba chingna iani bidingo dakchakegiparang dongkujaenga. Iani bidingo chinga sana badi ka·gen ma·sijae jrip dongtokaienga,” ine songni saksa Apu Marak parakataha.
Koborko on·ani gitade, ia song gita Rongdu chiring jokengani gimin JJM project-naba ia chiringonikon jakkalna miksongani dongachim. Ia project-na dam-rangkoba rikahachim indiba da·alonan ia dam-rango connect ka·e on·ade dongkujaenga ine songni manderang parakataha.
Ia songni badiaba badiaba biaprango GI aro HDPE pipe-rangkoba chimonge donahachim indiba ia kamko jako ra·gipa contractor, ia songni manderangna chirangko sale on·na gita maming kamrangko ka·chipjaha ine songni manderang parakataha.
Ia songo JJM-ni kamrang matchotgija dongchipengoba PHE department-oni darangba ia songona re·ange nia dongkuja ineba songni manderang parakataha.
Iani bidingo PHE official-rango sing·sandiatskaon, uamang ia obostani gimin ma·siaha aro kamko jako ra·gipa contractor-na show cause notice-ko on·manaha ine parakatskaaha.
“Kamrangko ta·raken a·bachengatchina chinga una u·iataniko on·ahachim indiba ua mamingkon aganchakkujaenga,” ine PHE official-rang parakataha.
Iani bidingo North Garo Hills a·jani Deputy Commissioner K Mithali Chandra-naba u·iaton, ua PHE department aro contractor-o iani bidingo sing·sandigen ine parakataha.
