SHILLONG: Sorkari officer-rangni aro contractual employee-rangni foreign a·songrangona songreani cholko komiatna gita a·dok sorkari tik ka·angaha.
Meghalaya a·doko tangka paisani gita neng·nikanirangko chagrongna nangkuengani gimin sorkari officer-rangni foreign a·songrangona songreani cholko a·dok sorkari, bilsio changgniona komiatna tik ka·angaha.
Iani bidingo kobor ra·timgiparangna talataniko on·angengon, sorkarini je officer-rangba aro contractual employee-rangba bilsio changgnina bate foreign a·songrangona songrena chol man·jawaha ine Sukrobar salo, a·dokni Cabinet Minister Paul Lyngdoh parakataha.
Lyngdoh-ni parakatani gitade, bilsio changgni songrena cholko on·enggipaoni changsanade a·dok sorkari dakchake on·gen indiba changgipinnade ma·mong sorkari ba external agency-rang korosko gamskagen.
A·dok sorkarini pal, award-rangko ra·chakna re·anggenchimode, uandakgipa official-rangna sorkari mikkang niani dongskagen ineba Minister parakataha.
“A·doko tangka paisani gita neng·nikanirangko chagrongna nangengani gimin aro sorkari officer-rangna sualgrike cholko on·na nangengani gimin Cabinet, ia ja·kuko de·na tik ka·aha,” ine Lyngdoh aganaha.
Sorkari officer-rang gnigipa changna foreign a·songrangona re·angna nanggenchimode, ua skanggipa songreani report-ko sorkarina on·chengna nanggen aro uni report-ko sorkari ra·chakna man·a ong·ode, uni gnigipa songreanganikoba sorkari ra·chakgen ineba ua aganaha.
Cabinet minister-rangnaba ia apsan niamkon ja·rikgenma ine sing·skaon, Minister-rangni songreanide External Affairs Ministry-ni ra·chakaniosa pangchakaigen ine Lyngdoh parakataha.
